પહેલા 2 ઓક્ટોબરથી આખા દેશમાં સિંગલ યુઝ પ્લાસ્ટિકના ઉપયોગ પર પ્રતિબંધ મૂકાવાનો હતો. અમુક કારણસર પ્રતિબંધ લદાયો નથી પરંતુ હવે સમય પાકી ગયો છે કે આપણે જાગૃત રીતે પ્લાસ્ટિકના વિકલ્પો શોધવાનું શરૂ કરીએ. રેસ્ટોરામાં પ્લાસ્ટિકના બદલે કાગળની સ્ટ્રો વપરાય છે. બામ્બૂ પણ પ્લાસ્ટિકનો સારો વિકલ્પ બની રહ્યું છે.સ્થાનિક સ્તરે પણ પ્લાસ્ટિકને રિપ્લેસ કરવાના રસ્તા લોકો શોધી રહ્યા છે. તાજેતરમાં કિરણ રિજિજુએ એક વીડિયો શેર કર્યો હતો જે વાયરલ થઈ રહ્યો છે. આ વીડિયો અરુણાચલ પ્રદેશના એક સ્થાનિક માંસ વેચતા વેપારીનો છે. આ વેપારી પોલિથીનને બદલે પાંદડામાં માછલી બાંધીને આપતો દેખાય છે. આમાં થોડો વધારે સમય જરૂર લાગે છે પરંતુ આ વેપારીની પર્યાવરણના સંરક્ષણ માટે પ્રતિબદ્ધતા જરૂર દેખાય છે. સ્થાનિકોએ પ્લાસ્ટિકની કોથળીને બદલે પાંદડા ગૂંથીને બનાવેલી બાસ્કેટમાં શાક વેચવાનું શરૂ કર્યું છે. આ પગલા ભલે નાના હોય પણ લાંબા ગાળે આવા જ નાના નાના પગલા ભરીને આપણે પર્યાવરણનું રક્ષણ કરી શકીશું.
આદિવાસીઓએ દોડાવ્યું જબરું દિમાગ, શોધી કાઢ્યો પ્લાસ્ટિકનો અસરકારક વિકલ્પ
Indiatimes 7 Oct 2019, 4:07 pm