ઉન્નાવ રેપ કેસ: ભાજપના ધારાસભ્ય કુલદીપ સેંગર દોષિત, 19 ડિસેમ્બરે સંભળાવાશે સજા

નવી દિલ્હી: ઉન્નાવ રેપ કેસમાં ભાજપના ધારાસભ્ય કુલદીપસિંહ સેંગરને કોર્ટે દોષિત ઠેરવ્યો છે. સેંગરની મહિલા સહયોગી શશિ સિંહને કોર્ટે શંકાનો લાભ આપી મુક્ત કરી છે. દિલ્હીની તીસ હજારી કોર્ટના સેશન જજ ધર્મેશ શર્માએ સેંગરને દોષિત ઠેરવ્યા બાદ હવે 19 ડિસેમ્બરે તેને સજા સંભળાવવામાં આવશે. સુપ્રીમના આદેશ પર આ કેસની રોજેરોજ સુનાવણી કરવામાં આવી રહી હતી. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો સુપ્રીમ કોર્ટે આદેશ આપ્યા બાદ આ કેસને લખનઉથી દિલ્હી ટ્રાન્સફર કરવામાં આવ્યો હતો. સેંગર પર પોક્સો ઉપરાંત, અપહરણ તેમજ બળાત્કારની કલમો પણ લગાવવામાં આવી હતી. ભાજપના ધારાસભ્ય પર 4 જૂન 2017ના રોજ નોકરીની લાલચ આપીને 16 વર્ષની કિશોરીનો રેપ કરવાનો આરોપ હતો. આ કેસ ઉન્નાવ કાંડ તરીકે પણ જાણીતો બન્યો હતો. આ સમગ્ર ઘટના ત્યારે ચર્ચામાં આવી હતી જ્યારે પીડિતા અને તેની માતાએ સીએમ યોગી આદિત્યનાથના ઘરની બહાર આત્મદાહની કોશિશ કરી હતી. પીડિતાના પિતા વિરુદ્ધ 3 એપ્રિલ 2018ના રોજ આર્મ્સ એક્ટ હેઠળ ગુનો નોંધવામાં આવ્યો હતો, અને પોલીસ કસ્ટડીમાં જ તેમને ખૂબ જ માર મારવામાં આવતા તેમનું મોત થયું હતું. 28 જુલાઈના રોજ કાકાને મળીને પીડિતા પાછી આવી રહી હતી ત્યારે રાયબરેલીમાં પીડિતા, તેની કાકી, માસી અને વકીલની કારને એક ટ્રકે ટક્કર મારી દીધી હતી. જેમાં કાકી અને માસીનું મોત થયુ હતું, જ્યારે પીડિતા અને વકીલ ઘાયલ થઈ ગયા હતા. સુપ્રીમના આદેશ પર લખનઉથી દિલ્હી લાવીને તેની સારવાર ચાલુ કરાવાઈ હતી. હાલ પીડિતા પરિવાર સાથે દિલ્હી જ રહે છે કારણકે તેના પરિવારે ઉન્નાવ પાછા જવાનો ઈનકાર કરી દીધો છે.