'નરાધમ' જૂનિયર એન્જિનિયર, 10 વર્ષમાં 50 બાળકો સાથે કર્યું ગંદુ કામ

નવી દિલ્હી: ઉત્તર પ્રદેશના સિંચાઈ વિભાગમાં કાર્યરત એક જૂનિયર એન્જિનિયરની સીબીઆઈએ ધરપકડ કરી છે. અધિકારીઓએ મંગળવારે આ જાણકારી આપી. અધિકારીઓએ જણાવ્યું કે, કથિત રીતે આ જૂનિયર એન્જિનિયર બાળકોનું 10 વર્ષથી શારીરિક શોષણ કરી રહ્યો હતો. એટલું જ નહીં, આરોપી આ પોતાના જઘન્ય કૃત્યનો વિડીયો બનાવતો અને તેને પોર્ન સાઈટ્સને વેચી દેતો હતો.

અધિકારીઓનું કહેવું છે કે, આ જઘન્ય કૃત્ય કરનારા આરોપીએ લગભગ 50 બાળકોને પોતાનો શિકાર બનાવ્યા. આ બાળકોની ઉંમર 5થી 16 વર્ષની હતી. પીડિત બાળકો બાંદા, ચિત્રકૂટ અને હમીપુરના રહેવાસી હતા. આ કૃત્યને અંજામ આપનારા આરોપીની બાંદાથી ધરપકડ કરી હતી અને તેને જલદી જ કોર્ટમાં રજૂ કરાશે.

સીબીઆઈને આરોપી પાસેથી 8 મોબાઈલ ફોન, 8 લાખ રૂપિયા રોકડા, સેક્સ ટોયઝ, લેપટોપની સાથે-સાથે ઘણા અન્ય ડિજિટલ પુરાવા પણ મળ્યા છે.

સીબીઆઈના અધિકારીઓએ એમ પણ જણાવ્યું કે, આરોપી જૂનિયર એન્જિનિયર 10 વર્ષથી આ કામ કરી રહ્યો હતો. તે બાળકોના શારીરિક શોષણ સંબંધિત સામગ્રી પોર્ન સાઈટ્સને આપતો હતો. પૂછપરછમાં આરોપીએ એમ પણ જણાવ્યું છે કે, તે પોતાના આ કૃત્યને છૂપાવવા માટે પીડિત બાળકોને રૂપિયા, ઈલેક્ટ્રોનિક્સ ઉપકરણ સહિત ઘણી અન્ય વસ્તુઓ પણ આપતો હતો.