મુંબઈ અને આસપાસના વિસ્તારોમાં તોફાની વરસાદ થઈ રહ્યો છે. ભારે વરસાદના કારણે મુંબઈમાં તકલીફો વધી રહી છે. ઠેર-ઠેર રસ્તાઓ પર પાણી ભરાઈ ગયા છે. ભારે વરસાદના કારણે લોકો ટ્રાફિકમાં ફસાઈ ગયા છે. હવામાન વિભાગે મુંબઈ મધ્યમાં દરિયાની નજીકના વિસ્તારોમાં ઓરેન્જ એલર્ટ જાહેર કર્યું છે. હવામાં વિભાગ દ્વારા આગાહી કરવામાં આવી છે કે આગામી કલાકો દરમિયાન પણ અતિભારે વરસાદ થઈ શકે છે.
મુંબઈમાં તોફાની વરસાદ ખાબક્યો, હાલ થયા બેહાલમુંબઈમાં ભારે વરસાદની સાથે હાઈટાઈડ એલર્ટ પણ જાહેર કરવામાં આવ્યું છે. હાઈટાઈડ દરમિયાન સાંજે દરિયાના મોજા 3 મીટર સુધી ઉછળી શકે છે. બુધવારે ભારે વરસાદના કારણે વસ્ટર્ન એક્સપ્રેસ હાઈવે પર વિલે પાર્લે અને સાંતાક્રૂઝમાં ટ્રાફિક જામ થઈ ગયો હતો. સાયન, કિંગ્સ, સક્રિલ, ખાર, હિંદમાતા જેવા વિસ્તારોમાં રસ્તાઓ પર નદીઓ વહેતી હોય તેવા દૃશ્યો સર્જાયા છે.
IMDના ડેપ્યુટી ડિરેક્ટર કેએસ હોલસેકરે કહ્યું છે કે, “અનુમાન છે કે આજે મુંબઈ, ઠાણે સહિત કોંકણ પર ભારેથી અતિભારે વરસાદ થઈ શકે છે. કેટલીક જગ્યાઓ પર ભારેથી અતિભારે વરસાદ થવાની સંભાવના છે.” તેમણે ગુરુવારે વરસાદનું જોર ઘટવાની સંભાવના વ્યક્ત કરી છે.
ખારના એસવી રોડ પર એટલો જબરજસ્ત વરસાદ થયો કે BEST પણ પાણીમાં અડધી ડૂબીને ફસાઈ ગઈ છે. બસમાંથી મુસાફરોને સુરક્ષિત રીતે બહાર કાઢી લેવામાં આવ્યા હતા.
હવામાન વિભાગની આગાહી પ્રમાણે 24 કલાકમાં કોલાબા સેન્ટર પર 121.6mm, સાંતાક્રૂઝમાં 96.6mm, રત્નાગિરિમાં 101.3mm અને અલીબાગમાં 122.6mm વરસાદ થયો છે. ભારે વરસાદના કારણે રસ્તાઓ પર ઠેર-ઠેર ટ્રાફિક જામ થઈ રહ્યો છે અને હાઈટાઈડ એલર્ટે લોકોની ચિંતામાં વધારો કર્યો છે.