ખુશખબર: ઓક્સફોર્ડની રસીની બીજા સ્ટેજની હ્યુમન ટ્રાયલમાં કોઈ આડઅસર ના દેખાઈ

પુણેઃ ભારતી વિદ્યાપીઠ મેડિકલ કોલેજ એન્ડ હોસ્પિટલે કહ્યું કે જે બે લોકોને બુધવાર કોવિડ-19ની વેક્સીનનો પહેલો ડોઝ આપવામાં આવ્યો હતો. તેમનું આરોગ્ય બિલકુલ સામાન્ય છે. હોસ્પિટલ તરફથી એક વરિષ્ઠ ડોક્ટરે ગુરુવારે આ જાણકારી આપી હતી.

ક્લિનિકલ ટ્રાયલના બીજા તબક્કામાં, પુણેની સીરમ ઇન્સ્ટિટ્યૂટ ઓફ ઇન્ડિયા (SII) દ્વારા બનાવાયેલી કોવિશિલ્ડ રસીનો પ્રથમ 'ડોઝ' બુધવારે 32 અને 48 વર્ષની બે વ્યક્તિઓને આપવામાં આવ્યો હતો. એક અધિકારીએ જણાવ્યું હતું કે એક મહિના પછી આ બંને વ્યક્તિઓને બીજો ડોઝ આપવામાં આવશે.

રસી આપ્યા બાદ કોઈ સાઇડ ઇફેક્ટ નથી

મેડિકલ કોલેજ અને હોસ્પિટલના ડેપ્યુટી ડિરેક્ટર ઓફ મેડિસિન ડો.જિતેન્દ્ર ઓસ્વાલે જણાવ્યું હતું કે, “ગઈકાલથી અમારી મેડિકલ ટીમ બંને લોકોના સંપર્કમાં છે અને તે બંને બરાબર છે. તેમને કોઈ પીડા, તાવ, ઇન્જેક્શનની કોઈ આડઅસર કે રસી લીધા પછી કોઈ વધુ મુશ્કેલી જણાઈ નથી. '

ટીમની સતત તેમના પર નજર

તેમણે જણાવ્યું હતું કે બુધવારે રસી અપાયા બાદ બંનેને અડધા કલાક સુધી નિષ્ણાંતોની નજર હેઠળ રાખવામાં આવ્યા હતા, ત્યારબાદ જ તેઓને ઘરે જવા દેવાયા હતા. ડો. ઓસ્વાલે કહ્યું, "તેઓને તમામ જરૂરી નંબરો આપવામાં આવ્યા હતા કે જેના પર ઇમરજન્સીમાં સંપર્ક થઈ શકે." અમારી મેડિકલ ટીમ પણ સતત તેમના સંપર્કમાં છે. '

આગામી 7 દિવસમાં બીજા 25ને રસી

હોસ્પિટલના મેડિકલ ડિરેક્ટર ડો. સંજય લાલવાણીએ બુધવારે જણાવ્યું હતું કે બંને વ્યક્તિઓને એક મહિના પછી રસીનો વધુ એક ડોઝ આપવામાં આવશે અને આગામી સાત દિવસમાં 25 લોકોને રસી આપવામાં આવશે.