લગ્ન અટકાવવા પોલીસ પહોંચી તો દીકરીની બદલે માતા બની ગઈ દુલ્હન, પિતાએ કેમ હકીકત જણાવી દીધી?

હકિકતમાં પતિ સાથે વિવાદ થયા બાદ મહિલા પતિ સાથે અલગ થઈ ગઈ હતી અને પોતાની બાળકી સાથે મહિલા સુસનેર વિસ્તારમાં આવેલા મેહંદી ગામમાં રહેવા લાગીહતી. અક્ષય તૃતિયાના દિવસે 12 વર્ષીય બાળકીના લગ્ન હતા. લગ્ન માટે મહેમાનો આવી ગયા હતા. જો કે, બાળકી લગ્ન માટે તૈયાર હતી નહીં. તેમ છતાં મહિલા તેની દીકરીના લગ્ન કરવવા માંગતી હતી. પોતાની દીકરીના લગ્ન અંગેની માહિતી પિતાને મળી હતી.

દીકરીના બાળલગ્નની જાણકારી મળતા પિતાએ સુસનેર પોલીસને સમગ્ર બાબતે માહિતી આપી હતી. સાથે આ બાળવિવાહ રોકાવવા માટે મદદ પણ માગી હતી. જાણકારી મળતા જ પોલીસની ટીમ મેહંદી ગામે પહોંચી હતી અને જે ઘરે આ લગ્ન યોજાઈ રહ્યા હતા તે ઘરે પોલીસ પહોંચી હતી. જો કે, પોલીસ આવી રહી છે તેવી જાણકારી મળતા 12 વર્ષીય દુલ્હનને માતાએ ગાયબ કરી દીધી હતી.

પોલીસને ચકમો આપવા માટે બાળકીની માતાએ સ્વાંગ રચ્યો હતો. બાળકીની માતા ખુદ દુલ્હન બની ગઈ હતી. માતાએ દુલ્હનના કપડા તથા દાગીના પહેરી લીધા હતા. જ્યારે પોલીસ દુલ્હનના રૂમમાં પહોંચી તો મહિલાને જોઈને દંગ રહી ગઈ હતી. પોલીસે જ્યારે બાળ લગ્નની પૂછપરછ કરી તો મહિલાએ કહ્યુ હતુ કે, અહીં તો મારા લગ્ન થઈ રહ્યા છે. સમગ્ર મામલે પોલીસે એવુ ધારી લીધુ કે, કોઈએ અમને ખોટી માહિતી આપી છે. જો કે, મહિલાની ઉંમર જોઈને પોલીસને પણ મહિલા પર શક થયો હતો.

આ વચ્ચે પોલીસે જે વ્યક્તિએ માહિતી આપી હતી તે વ્યક્તિને બોલાવ્યો હતો. આ વ્યક્તિ મહિલાનો પતિ જ હતો. કન્યા રૂમમાં પહોંચીને પતિએ પત્નીની ઓળખ કરી લીધી હતી અને પોલીસને જણાવ્યુ હતુ કે, આ મારી પત્ની છે. આ બાદ પોલીસે આરોપી મહિલાની અટકાયત કરી હતી.

સુસનેરના પોલીસ અધિકારીએ જણાવ્યુ હતુ કે, અમે બાળકીની તપાસ કરી રહ્યા હતા ત્યારે અમને આ મહિલા દુલ્હનના કપડા પહેરીને મળી હતી અને કહ્યું હતુ કે, અહીં મારા લગ્ન છે. જો કે, તેની ઉંમર જોઈને અમને શક થયો હતો. અમે જ્યારે માહિતી આપનાર વ્યક્તિને બોલાવ્યો ત્યારે સમગ્ર ભાંડો ફૂટ્યો. મહિલાને બાળલગ્નની જાણકારી આપીને છોડી દેવામાં આવી છે.