છોડી દીધી હતી દિલ્હી પોલીસની નોકરી, 44 વખત જેલ જઈ આવ્યા છે રાકેશ ટિકૈત

રાકેશ ટિકૈત દેશના જાણીતા ખેડૂત નેતા મહેન્દ્ર સિંહ ટિકૈતના પુત્ર છે. તેઓ પોતે ઘણા સમયથી ખેડૂતોના હકોની લડાઈ લડી રહ્યા છે. વિવિધ મંચ પર તેઓ ખેડૂતોના પ્રશ્નો ઉઠાવતા રહ્યા છે. કહેવામાં આવી રહ્યું છે કે ખેડૂતો માટે લડવાના કારણે તેઓ 44 વખત જેલમાં જઈ આવ્યા છે. થોડા સમય અગાઉ તેમણે સંસદ ભવન બહાર શેરડીની કિંમત વધારવા માટે કેન્દ્ર સરકાર વિરુદ્ધ પ્રદર્શન કર્યું હતું. જેના કારણે તેમને તિહાર જેલમાં મોકલવામાં આવ્યા હતા. તેમણે સંસદ ભવન બહાર શેરડી પણ સળગાવી હતી.

વધતી લોકપ્રિયતાને જઈને રાકેશ ટિકૈતે રાજકારણમાં પણ પોતાનો હાથ અજમાવ્યો હતો. રાષ્ટ્રીય લોકદળના અધ્યક્ષ અજીત સિંહે 2014મા યોજાયેલી લોકસભાની ચૂંટણીમાં અમરોહા બેઠક પરથી તેમને ઉમેદવાર બનાવ્યા હતા. જોકે, રાકેશ ટિકૈતને પરાજયનો સામનો કરવો પડ્યો હતો. તેમણે મેરઠ યુનિવર્સિટીમાંથી એમએનો અભ્યાસ કર્યો હતો અને બાદમાં એલએલબી પણ કર્યું હતું.

રાકેશ ટિકૈત વર્ષ 1992મા દિલ્હી પોલીસમાં કોન્સ્ટેબલની નોકરી કરતા હતા પરંતુ પિતા મહેન્દ્ર સિંહ ટિકૈતનો તેમના પર ઘણો પ્રભાવ હતો. જેના કારણે તેમણે 1993-93મા લાલ કિલ્લા પર પિતા મહેન્દ્ર સિંહ ટિકૈતના નેતૃત્વમાં ખેડૂતોનું આંદોલન ચાલી રહ્યું હતું ત્યારે તેઓ ભાવુક થઈ ગયા હતા. રાકેશ ટિકૈત પર સરકારે આંદોલન સમેટી લેવાનું દબાણ કર્યું હતું. આ સાથે કહ્યું હતું કે તેઓ પોતાના પિતા અને ભાઈઓને પણ આંદોલન પૂરૂ કરવાનું કહે. જોકે, બાદમાં રાકેશ ટિકૈત પોલીસની નોકરી છોડીને ખેડૂતોની સાથે ઊભા રહ્યાહ તા. પિતાના મૃત્યુ બાદ રાકેશ ટિકૈતે ભારતીય કિસાન યુનિયન (બીકેયુ)ની કમાન સંભાળી લીધી હતી.

પ્રજાસત્તાક દિવસે દિલ્હીમાં ખેડૂતોએ ટ્રેક્ટર પરેડ નીકાળી હતી. જોકે, આ દરમિયાન દિલ્હીમાં ઘણી જગ્યાઓએ હિંસા થઈ હતી. ખેડૂતોએ લાલ કિલ્લા પર ધાર્મિક ધ્વજ ફરકાવી દીધો હતો તથા પોલીસ સાથે પણ મારામારી કરી હતી. જેને લઈને હવે ખેડૂત આંદોલન પર સવાલો ઉઠી રહ્યા છે. કેટલાક ખેડૂત સંગઠનોએ પોતાને આ આંદોલનથી અલગ કરી દીધા છે. જ્યારે સરકાર પણ હવે આંદોલન સમેટી લેવા માટે ખેડૂતો પર દબાણ કરી રહી છે.