ભારતમાં આટલા ઝડપથી કેમ વધી રહ્યાં છે કોરોનાના કેસ? ICMRએ જણાવ્યું કારણ

નવી દિલ્હી: ભારતમાં કોરોના વાયરસના કેસમાં સતત વધારો થઈ રહ્યો છે. દેશના ઘણા એવા રાજ્યો છે જ્યાં ચેપની સ્થિતિ વિસ્ફોટક હોવાનું માનવામાં આવે છે. મંગળવારે દેશમાં કોરોના વાયરસના ઇન્ફેક્શનની કુલ સંખ્યા 32 લાખને વટાવી ગઈ છે. જ્યારે કોરોનાને કારણે દેશમાં અત્યાર સુધી 59 હજારથી વધુ લોકો મૃત્યુ પામ્યા છે. આમ ભારતમાં કોરોનાના કેસ અને મૃત્યુઆંકમાં ચિંતાજનક વધારો થઈ રહ્યો છે. જોકે, રાહતની વાત એ છે કે, દર્દીઓ ઝડપથી રીકવર પણ થઈ રહ્યા છે.

બેજવાબદાર લોકોને કારણે વધી રહ્યું છે સંક્રમણ
ઈન્ડિયન કાઉન્સિલ ઓફ મેડિકલ રિસર્ચ (ICMR)ના ડાયરેક્ટર જનરલ બલારમ ભાર્ગવે મંગળવારે કહ્યું કે દેશમાં કોરોના ફાટી નીકળવાના કેટલાક મોટા કારણો છે. તેમણે કહ્યું કે કેટલાક બેજવાબદાર લોકો માસ્ક ન પહેરતા હોવા અને સામાજિક અંતર ન રાખવાને કારણે ભારતમાં કોરોના વાયરસનો રોગચાળો વધી રહ્યો છે. ભાર્ગવે એમ પણ કહ્યું હતું કે ICMRએ બીજો રાષ્ટ્રીય સેરો સર્વે શરૂ કર્યો છે, જે સપ્ટેમ્બરના પહેલા અઠવાડિયા સુધીમાં પૂર્ણ થશે.

માસ્ક અને સોશિયલ ડિસ્ટન્સિંગનું પાલન જરૂરી
એક પ્રેસ બ્રીફિંગમાં ભાર્ગવે એક પ્રશ્નના જવાબમાં કહ્યું કે 'હું એવું નથી કહી રહ્યો કે યુવાન કે વૃદ્ધ લોકો આવું કરી રહ્યા છે, હું એમ કહી રહ્યો છું કે બેજવાબદાર લોકો જાહેરમાં માસ્ક તેમજ સોશિયલ ડિસ્ટન્સિંગ ન જાળવતા હોવાથી કોરોના મહામારી ઝડપથી વધી રહી છે. તેમણે કહ્યું કે છેલ્લા રાષ્ટ્રીય સેરો સર્વેના સમગ્ર અહેવાલની બે વાર સમીક્ષા કરવામાં આવી છે અને આ અઠવાડિયાના અંતે ઈન્ડિયન મેડિકલ રિસર્ચ જર્નલમાં પ્રકાશિત કરાય તેવી શક્યતા છે.

વેક્સીન અંગે રશિયા સાથે થઈ રહી છે વાતચીત
કેન્દ્રીય આરોગ્ય મંત્રાલયે મંગળવારે કહ્યું કે કોરોનાની વેક્સીન Sputnik V અંગે ભારત અને રશિયા સંપર્કમાં છે. આરોગ્ય મંત્રાલયના સચિવ રાજેશ ભૂષણે જણાવ્યું હતું કે, બંને દેશો વચ્ચે પ્રારંભિક માહિતી પણ શેર કરવામાં આવી છે. આ દરમિયાન સૂત્રોએ અહેવાલ આપ્યો છે કે રશિયાએ Sputnik V રસી બનાવવા અને ભારતમાં તેના ત્રીજી તબક્કાના પરીક્ષણ હાથ ધરવા માટે નવી દિલ્હીથી સહયોગ માંગ્યો છે.