પાડોશી સાથે ભાગી ગઈ છોકરી, પરિવારજનોએ યુવકની માને ઉઠાવીને ના કરવાનું કર્યું

પટણા: એક વિચિત્ર ઘટનામાં દીકરાના લવમેરેજની સજા તેની લાચાર માતાને ભોગવવાનો વારો આવ્યો છે. પ્રાપ્ત વિગતો અનુસાર, 43 વર્ષીય મહિલાને તેના દીકરાએ કરેલા લવમેરેજની સજાના ભાગરુપે એક અપંગ દલિત વ્યક્તિ સાથે લગ્ન કરવાની ફરજ પાડવામાં આવી હતી, આ ઘટના બિહારના દરભંગા જિલ્લાના એક ગામની છે.

મહિલાના દીકરાએ એક છોકરી સાથે ભાગી ગયા બાદ સોશિયલ મીડિયા પર પોતાના લગ્નની તસવીરો મૂકતા ગિન્નાયેલા યુવતીના પરિવારજનો યુવકની માતાને પકડી લાવ્યા હતા. તેમણે જબરજસ્તી એક દલિત સાથે મહિલાના લગ્ન કરાવી દીધા અને ત્યારબાદ તેનું મુંડન પણ કરી દેવાયું હતું.

14 નવેમ્બરના રોજ બનેલી આ ઘટનાનો વિડીયો તાજેતરમાં જ સોશિયલ મીડિયા પર વાયરલ થયો હતો. પોલીસના જણાવ્યા અનુસાર, મહિલાનો 21 વર્ષીય દીકરો 18 વર્ષની એક છોકરીને લઈને ભાગી ગયો હતો, અને બંનેનો હાલ કોઈ પત્તો નથી. મહિલા સાથે દુર્વ્યવહાર કરનારા બે શખ્સોની હાલ ધરપકડ કરવામાં આવી છે.

આ મામલે મહિલાના પતિએ 15 લોકો વિરુદ્ધ ફરિયાદ નોંધાવી છે. છોકરો જે છોકરીને લઈને ભાગ્યો હતો તે તેની બાજુમાં જ રહેતી હતી. હાલ પોલીસે સોશિયલ મીડિયા પરથી આ ઘટનાના વિડીયો હટાવવા માટે પણ કાર્યવાહી શરુ કરી છે. પોલીસે છોકરીના બે કાકાની આ મામલે ધરપકડ કરી છે, અને કેટલાક આરોપીઓ તો 80 વર્ષના છે, જેમની ધરપકડ બાકી છે.

નવાઈની વાત એ છે કે, એકબીજા સાથે ભાગીને લગ્ન કરી લેનારા છોકરો અને છોકરી એક જ જ્ઞાતિના હોવા છતાં છોકરીના પરિવારજનોને આ લગ્ન મંજૂર નથી. તેમને આ લગ્ન અંગે જાણ થઈ તે જ દિવસે તેમણે છોકરા, તેના મા-બાપ અને અન્ય પાંચ પરિવારજનો સામે અપહરણની ફરિયાદ નોંધાવી હતી.

ફરિયાદ નોંધાયાની જાણ થયા બાદ છોકરા-છોકરીએ પોતાના લગ્નના ફોટા સોશિયલ મીડિયા પર શેર કર્યા હતા. જેનાથી ઓ ગિન્નાયેલા છોકરીના પરિવારજનો છોકરાના ઘરમાં ઘૂસી ગયા હતા, અને છોકરાની માને જબરજસ્તી ઉઠાવી પોતાના ઘરે લઈ આવ્યા હતા.

મહિલાને પોતાના ઘરમાં જબરજસ્તી લઈ આવેલા છોકરીના પરિવારજનોએ તેનું મુંડન કરી નાખ્યું હતું, અને નજીકમાં રહેતા એક દલિત વ્યક્તિને બોલાવીને જબરજસ્તી તેની પાસે મહિલાની સેથામાં સિંદૂર પુરાવી દઈ એકબીજાને ફુલની માળા પહેરાવવા પણ તેમને ફરજ પાડવામાં આવી હતી.