ગજબ! યૂટ્યુબરે 1 રુપિયાના 2.6 લાખ સિક્કા આપીને ખરીદી પોતાની સપનાની બાઈક, સ્ટાફને ગણતાં 10 કલાક થયા

સાલેમ- બાળપણમાં એવું ઘણી વાર બન્યું હશે કે તમે પોતાની મનગમતી કોઈ વસ્તુ ખરીદવા માટે તમારો પૈસાનો ગલ્લો તોડ્યો હશે અને તે પૈસા ભેગા કરીને પોતાનો શોખ પૂરો કર્યો હશે. પરંતુ શું તમે વિચારી શકો છો કે કોઈ વ્યક્તિ એક રૂપિયાના સિક્કા ભેગા કરીને પોતાની સપનાની બાઈક જેની કિંમત 2.6 લાખ રૂપિયા છે તે ખરીદી શકે? પરંતુ તમિલનાડુના સાલેમમાં રહેલા વી બૂબથીએ શનિવારના રોજ એક રૂપિયાના સિક્કા આપીને બ્રાન્ડ ન્યુ બજાજ Dominar 400CC બાઈક ખરીદી છે. તમને વિશ્વાસ નહીં થાય, પરંતુ આ હકીકત છે.

1947ના ભાગલામાં વિખૂટા પડેલાં ભાઈઓનો યુટ્યુબરે ભેટો કરાવ્યો, 74 વર્ષે પાકિસ્તાનમાં પરિવારને મળ્યા
ભારત એજન્સી નામની મોટર સાઈકલની દુકાનના મેનેજરે આ વાતની પૃષ્ટિ કરી છે. તેમણે જણાવ્યું કે, અમારી દુકાનના કર્મચારીઓને આ પૈસા ગણતા 10 કલાક લાગ્યા હતા. ઉલ્લેખનીય છે કે બૂબથી પાછલા 3 વર્ષથી આ પૈસા જમા કરતો હતો. બૂબથીએ બેચલર ઓફ કમ્પ્યુટર એપ્લિકેશનનો અભ્યાસ કર્યો છે અને પોતાની યૂટ્યુબ ચેનલ શરૂ કરતા પહેલા તે એક ખાનગી કંપનીમાં કમ્પ્યુટર ઓપરેટરનું કામ કરતો હતો. ચાર વર્ષ પહેલા તેણે પોતાની યૂટ્યુબ ચેનલની શરુઆત કરી હતી. 3 વર્ષ પહેલા તેણે આ બાઈક ખરીદવાનું સપનું જોયુ હતું પરંતુ તેની પાસે બાઈક ખરીદવાના પૈસા નહોતા. તે સમયે બાઈકની કિંમત બે લાખ રુપિયા હતી.

પોતાનું સપનું સાકાર કરવા બબૂથીએ સેવિંગ કરવાની શરૂઆત કરી. યૂટ્યુબ ચેનલથી તે જે કમાણી કરતો હતો તેમાંથી થોડા થોડા પૈસા બચાવતો રહેતો હતો. તે જણાવે છે કે, હું મંદિરો, હોટલો અને ચાની કિટલીઓ પરથી નોટના બદલામાં સિક્કા લેતો હતો. તાજેતરમાં જે તેને જાણ થઈ કે આ બાઈકની કિંમત વધીને 2.6 લાખ રુપિયા થઈ ગઈ છે. થોડા દિવસ પહેલા તેણે પોતાના સિક્કાની ગણતરી કરી અને તેને ખબર પડી કે તેની પાસે સપનું સાકાર કરવા માટે પૂરતા પૈસા છે.


ત્યારપછી બબૂથી ભારત એજન્સી ગયા અને મેનેજરને જણાવ્યું કે તે બાઈક ખરીદવા માંગે છે પરંતુ તેના માટે છૂટ્ટા પૈસા આપશે. શરુઆતમાં તો મેનેજરે ના પાડી દીધી હતી. મેનેજરે દલીલ કરી કે, બેન્ક એક લાખ રુપિયાની ગણતરી માટે 140 રુપિયા લેતી હોય છે, તો અમે જ્યારે તેમને 2.6 લાખનું પરચુરણ આપીશું તો તેઓ સ્વીકારશે કે કેમ? પરંતુ બબૂથીના સપનાને સમજીને આખરે તેઓ માની ગયા અને પછી ગણતરી શરૂ થઈ. શનિવારે રાત્રે લગભગ નવ વાગ્યે બબૂથી પોતાની બાઈક ઘરે લઈ ગયા.


બબૂથીનું સપનું તો સાકાર થઈ ગયુ પરંતુ મેનેજરની સમસ્યાનો હજી અંત નથી આવ્યો. મેનેજર જણાવે છે કે, બુધવારના રોજ હું આ પૈસા જમા કરાવવા સ્ટેટ બેન્ક ઓફ ઈન્ડિયા જઈશ. અમને આશા છે કે તેઓ આ પૈસા સ્વીકારશે.