કોરોનાની મહામારીમાં પોતાને ફિટ રાખવા માટે કસરત કરવી જરૂરી: WHO

કોરોના વાયરસની આ મહામારીમાં 18 વર્ષથી મોટી ઉંમરની વ્યક્તિને અઠવાડિયામાં ઓછામાં ઓછી 150 મિનિટ કસરત કરવી જરૂરી છે. વર્લ્ડ હેલ્થ ઓર્ગેનાઈઝેશનના જણાવ્યા મુજબ કોરોના વાયરસની મહામારીના આ સમયગાળામાં 18 વર્ષથી વધુ ઉંમરની દરેક વ્યક્તિએ અઠવાડિયામાં ઓછામાં ઓછી 150 મિનિટ કસરત ચોક્કસ કરવી જોઈએ. જે શારીરિક અને માનસિક સ્વાસ્થ્ય માટે ખૂબ જરૂરી છે.

વર્લ્ડ હેલ્થ ઓર્ગેનાઈઝેશને એક દાયકામાં પહેલી વખત આ પ્રકારે કોઈ ગાઈડલાઈન જાહેર કરી છે. WHO એટલે કે વર્લ્ડ હેલ્થ ઓર્ગેનાઈઝેશને કહ્યું કે કોરોના વાયરસની આ મહામારીમાં દરેક ઉંમરના લોકોએ પોતાના વ્યવહાર પર કાબૂ મેળવવાનો પ્રયાસ કરવો જોઈએ અને બીમારીઓથી દૂર રહેવાનો પ્રયાસ કરવો જોઈએ. કસરત વધુ કરશો તો માનસિક સ્વાસ્થ્યને તંદુરસ્ત રાખવામાં મદદ મળશે. આ માટે WHOએ એવરી મૂવ કાઉન્ટ્સ નામનું એક કેમ્પેઈન શરૂ કર્યું છે.

WHOએ પોતાની સલાહમાં જણાવ્યું કે કસરત કરવાથી અથવા શારીરિક પ્રવૃત્તિઓમાં વધારો કરતા હાર્ટનો ખતરો, ટાઈપ 2 ડાયાબિટીસ અને કેન્સર જેવા રોગોની સામે લડવામાં મદદ મળે છે, સાથે-સાથે ડિપ્રેશન જેવી સમસ્યાઓ પણ થતી નથી.

WHOએ વધુમાં જણાવ્યું કે કોરોના વાયરસની આ મહામારીના સમયમાં શારીરિક પ્રવૃત્તિઓ એટલે કે કસરતની મદદથી રોગપ્રતિકારક શક્તિ વધારવામાં મદદ મળશે. તમે પરિવારની સાથે ઘરમાં જ કસરત કરી શકો છો અને સમય મળતા ઘરની બહાર જઈને કસરત કરી શકો છો.