કોરોના વાયરસનું સંક્રમણ ફેલાતુ રોકવા માટે અસરકારક સાબિત થઈ રહ્યા છે ઘરે બનાવેલા માસ્ક

વોશિંગ્ટન: ઘરના કપડામાંથી તૈયાર કરવામાં આવેલા માસ્ક પણ કોરોના વાયરસથી બચવા માટે ઉપયોગી હોવાનું એક રિસર્ચમાં જાણવા મળ્યું છે. કફ અને ઉધરસ દરમિયાન જે ડ્રોપલેટ ઉત્પન્ન થાય છે તે આ ઘરે બનાવેલા માસ્કમાં અટકી જાય છે અને સંક્રમણ ફેલાવાની શક્યતાઓ રહેતી નથી. કોરોના વાયરસનું સંક્રમણ રોકવા અને તેનાથી બચવા માટે જે રીતે સિંગલ લેયર માસ્ક સુરક્ષિત છે તે પ્રકારે જ ઘરના કપડામાંથી તૈયાર કરવામાં આવેલા માસ્ક પણ ઉપયોગી છે.

કોઈપણ વ્યક્તિ જ્યારે પણ કશું બોલે, કફ થયો હોય અથવા છીંક આવે ત્યારે સૌથી વધુ પ્રમાણમાં ડ્રોપલેટ્સ ઉત્પન્ન થાય છે. જે આસપાસના વાતાવરણમાં ફેલાય છે અને તેમાં વાયરસના કણ રહેલા હોય છે. પણ, જો માસ્ક પહેર્યું હોય તો આ ડ્રોપલેટ્સ બ્લોક થઈ જાય છે અને તે વ્યક્તિ આરામથી શ્વાસ પણ લઈ શકે છે.

વૈજ્ઞાનિકોએ ઘરમાં ઉપયોગી કપડા, નવા અને વપરાશ થઈ ચૂક્યા હોય તેવા કપડા, રજાઈનું કપડું, ચાદર અને અન્ય કપડામાંથી તૈયાર માસ્કની શ્વસન પ્રક્રિયા અને તેમાં ડ્રોપલેટ બ્લોક થાય તે અંગેની ચકાસણી કરી. આ તારણમાં એવું જાણવા મળ્યું કે આ તમામ કપડાનો ટેસ્ટ અસરકારક સાબિત થયો છે. જે રીતે સિંગલ લેયર માસ્ક કોરોના સામે લડવા માટે ઉપયોગી સાબિત થઈ રહ્યું છે તે રીતે ઘરના કપડામાંથી તૈયાર કરેલુ માસ્ક પણ અસરકારક સાબિત થઈ રહ્યું છે.

વ્યક્તિ જ્યારે કશું બોલે, ઉધરસ આવે અથવા છીંકે ત્યારે જે ડ્રોપલેટ્સ ઉત્પન્ન થાય છે તેને આ માસ્ક બ્લોક કરી શકે છે. ટી-શર્ટના કપડામાં પણ ડ્રોપલેટ બ્લોક કરવાની ક્ષમતા તેટલી જ રહેલી છે કે જેટલી મેડિકલ માસ્કમાં રહેલી છે.