ઓનલાઈન અભ્યાસ કરતાં બાળકોને આટલું શીખવો, આંખો ખરાબ થવાની ચિંતા નહીં રહે

કોમ્યુનિકેશનના તમામ પ્રકાર હવે મુખ્યત્વે ઓનલાઈન થઈ ગયા છે ત્યારે બાળકોના સ્ક્રીન ટાઈમ પર નિયંત્રણ રાખવું મુશ્કેલ છે. ભણવાથી માંડીને ગેમ રમવા સુધી બાળકો ઘણો સમય મોબાઈલ કે લેપટોપ સામે વિતાવે છે. આપણે ટેક્નોલોજીના યુગમાં જીવી રહ્યા છે ત્યારે મોબાઈલ-લેપટોપ કે ટેબલેટ જેવા સાધનોથી દૂર રહેવું મુશ્કેલ છે. ત્યારે અહીં ચાર ઉપાયો જણાવી રહ્યા છીએ જેનાથી બાળકની આંખોની કાળજી લઈ શકાય છે.

તમારું બાળક ફોનને આંખોની ખૂબ નજીક ના રાખે તેનું ધ્યાન રાખો. મોબાઈલ આંખની નજીક રહે તો નકામું ખેંચાણ અનુભવાય છે અને આંખના મસલ્સને નુકસાન થઈ શકે છે. જ્યારે લેપટોપ કે ડેસ્કટોપનો ઉપયોગ કરો ત્યારે મોનિટર આઈ લેવલ (આંખની બરાબર સામે સીધેસીધું જોઈ શકાય તેવું) પર હોય તેનું ધ્યાન રાખવું. જો લેપટોપ આંખોની બરાબર સામે ના ગોઠવાતું હોય તો વ્યવસ્થિત સેટ કરવા માટે પુસ્તકની ઉપર મૂકી શકો છો.

ઘણા બાળકોને ટીવી કે લેપટોપની એકદમ નજીક બેસવાની આદત હોય છે. આ રીતે બેસવાથી આંખને નુકસાન થાય છે. આંખો પર ખેંચાણ અને નુકસાન અટકાવવા માટે બાળકો ટીવી યોગ્ય અંતરેથી જોવે તેનું ધ્યાન રાખો. આ ઉપરાંત સ્માર્ટફોન, ટેબલેટ જેવા ડિજિટલ ડિવાઈસ પણ આંખથી ઓછામાં ઓછા 18થી 24 ઈંચના અંતરે હોય તે સુનિશ્ચિત કરવું. મોબાઈલ કે લેપટોપની બ્રાઈટનેસ પણ એ રીતે સેટ કરવી જેથી આંખોને તકલીફ ના પડે.

20/20/20 મેથડ પ્રમાણે, નિયમિત બ્રેક લેવા જરૂરી છે. 20/20/20ની મેથડ એટલે કે, દર 20 મિનિટે 20 સેકન્ડ માટે ડિજિટલ ડિવાઈસથી દૂર થાવ અને 20 ફુટ દૂર રહેલી વસ્તુ સામે જોવો. આ સિવાય બાળક આંખ પટપટાવે તે પણ જરૂરી છે. બાળકોને શીખવો કે, દર 30 મિનિટે 10 વખત ધીમેથી આંખ ખોલે અને બંધ કરે. આમ કરવાથી ડ્રાય આઈઝ અને આંખમાં ખંજવાળ આવવા જેવી સમસ્યામાંથી રાહત મળી શકે છે. બાળકને શીખવો કે તેઓ જ્યારે પણ કોઈ ગેજેટનો ઉપયોગ કરે તો ભૂલ્યા વિના આંખો આ રીતે પટપટાવે.