દિવાળીમાં વધેલું વજન કંટ્રોલમાં રાખવા મલાઇકાએ ઉત્કટ આસન કરવાની આપી સલાહ

દિવાળીમાં મીઠાઈ અને તળેલી ચટપટી વસ્તુઓ ખાઈને મજા લઈ રહ્યા છો. પરંતુ તેના કારણે આગામી સમયમાં વધી ગયેલા વજનની સમસ્યા થવી પણ સ્વાભાવિક છે. તો આ સમસ્યાને નિવારવા માટે ઘણા લોકો હવે વર્કઆઉટ પ્લાન બનાવવા લાગ્યા હશે. તેવામાં બોલિવૂડ અભિનેત્રી મલાઈકા અરોરા તેના ફેન્સને ઉત્કટાસન કરવાની સલાહ આપી રહી છે. ઉત્કટાસન કરતા મલાઈકાએ રોયલ બ્લૂ સ્પોટ્સ બ્રા અને તેવા જ કલરનું યોગા પેન્ટ પહેરીને પોતાનો ફોટો પણ ઈન્સ્ટાગ્રામ પર પોસ્ટ કર્યો છે.

તેમણે એમ પણ લખ્યું છે કે, ઉત્કટાસન કરવાથી હિપ્સ, જાંઘ અને કરોડરજ્જુના હાડકાં મજબૂત બને છે. તે હૃદય અને પેટ માટે ફાયદાકારક છે. ઉત્કટાસન કરવા માટે બંને પગની વચ્ચે થોડું અંતર રાખીને સીધા ઊભા રહો. તમારા બંને હાથને તમારા ખભાને સમાંતર તમારી સામેની બાજુ સીધા રાખતા હથેળી જમીનની તરફ અને કોણીને સીધી રાખો.


ઘૂંટણને વાળીને શરીરને એવી રીતે ઝુકાવવું જેમ કે તમે એક કાલ્પનિક ખુરશી પર બેઠા છો. આ સ્થિતિમાં રહો. આ દરમિયાન તમારા હાથ જમીનની સમાંતર હોવા જોઈએ. હવે કરોડરજ્જુના હાડકાને ખેંચતા સીધા બેસો અને આરામ કરો. મલાઈકા કહે છે કે, આ યોગાસન કરીને તમે તમારા તહેવારની મજાને બમણી કરી શકો છો.