જ્યારે ત્વચા સૂર્યના તાપના સંપર્કમાં આવે છે, તો શરીર વિટામિન ડીનું ઉત્પાદન કરે છે, તેનો અર્થ એ થયો કે, દરરોજ સૂર્યનો તાપ લેવાથી પર્યાપ્ત માત્રામાં વિટામિન ડી મળી શકે છે. તડકા સિવાય કેટલાંક ખાદ્ય પદાર્થો (Vitamin D rich foods) છે જેના સેવનથી વિટામિન ડીની આપૂર્તિ કરી શકાય છે.
અહીં સવાલ એ પણ છે કે, શરીરમાં વિટામિન ડીની ઉણપ વિશે કેવી રીતે ખ્યાલ આવશે? આ માટે બ્લડટેસ્ટ કરાવી શકાય છે, પરંતુ કેટલીક અન્ય રીત અથવા સંકેત કે લક્ષણો છે જેના દ્વારા તમને ખ્યાલ આવી શકે છે કે, તમારાં શરીરમાં આ વિટામિનની ઉણપ છે. વિટામિન ડીની ઉણપથી હાડકાંને નુકસાન થાય છે અને તે કમજોર બની શકે છે. અહીં જાણો, તેના લક્ષણો અને કેવા ખાદ્યપદાર્થોનું સેવન કરવું જોઇએ.
(તસવીરોઃ પિક્સાબે.કોમ, ફ્રિપિક.કોમ)
ઘા ભરવામાં સમય લાગવો
વિટામિન ડી ઘા ભરવાની શરીરની ક્ષમતાને વધારે છે, તેનો અર્થ એ છે કે, વિટામિન ડીની ઉણપ હશે તો ઘા ઝડપથી રૂઝાતા નથી. જો કે, આ લક્ષણ ડાયાબિટીસનું પણ છે, પરંતુ જો તમને શુગરની સમસ્યા નથી તો તમારે તત્કાળ ડોક્ટરની સલાહ લેવી જોઇએ.
ડિપ્રેશન
NCBI રિપોર્ટ અનુસાર, વિટામિન ડી વ્યક્તિની માનસિક સ્થિતિને પ્રભાવિત કરે છે, તેની ઉણપથી તમને ડીપ્રેશનની સમસ્યા થઇ શકે છે. અનેક અધ્યયનોમાં એવું સામે આવ્યું છે કે, વિટામિન ડીનો ખોરાક લેવાથી ડિપ્રેશનને દૂર કરવામાં સહાયતા મળી શકે છે.
થાક
જો તમે પર્યાપ્ત આરામ છતાં સતત થાકનો અનુભવ કરો છો તો તે વિટામિન ડીની ઉણપના સંકેત હોઇ શકે છે. ચોક્કસથી થાક કેન્સર અને ડાયાબિટીસ સહિત અનેક બીમારીઓના લક્ષણોમાંથી એક છે. પરંતુ જો તમને સતત માથાનો દુઃખાવો, અપુરતી ઉંઘ અને હાડકાંમાં દુઃખાવો રહે છે તો તે વિટામિન ડીની ઉણપના લક્ષણ છે.
કમરમાં સતત દુઃખાવો
વિટામિન ડી હાડકાંના સ્વાસ્થ્ય સાથે સંબંધિત છે, તેથી ઉણપથી હાડકાંમાં સતત દુઃખાવો રહે છે. વિટામિન ડી કેલ્શિયમને અવશોષિત કરી શરીરની ક્ષમતામાં વધારો કરી હાડકાંને પોષણ આપે છે. રિસર્ચ અનુસાર, ગાઉટ, માસપેશીઓમાં દુઃખાવો, સતત કમરના દુઃખાવાથી પીડિત લોકોમાં વિટામિન ડીનું સ્તર ઓછું હોય છે.
કેટલું હોવું જોઇએ પ્રમાણ
માયોક્લિનિક (Mayoclinic.org) અનુસાર, દરરોજ વિટામિનની આપૂર્તિની વાત કરીએ તો 12 મહિનાના બાળક માટે 400 ઇન્ટરનેશનલ યુનિટ (IU), 1થી 70 વર્ષના લોકો માટે 600 (IU) અને 70 વર્ષથી ઉપરના લોકો માટે 800 (IU) છે.
વિટામિન ડી રિચ ફૂડ
હાર્વર્ડ હેલ્થ (Harvard Health) અનુસાર, વિટામિન ડીની ઉણપ દૂર કરવા માટે ભોજનમાં કોડ લિવર ઓઇલ, ફિશ, સ્વોર્ડફિશ, ટ્યૂના ફિશ, સંતરાનો રસ, ડેરી અને પ્લાન્ટ બેઝ્ડ મિલ્ક, સાર્ડિન ફિશ, કલેજી, ઇંડાની જર્દી અને સેરેલ્સ સામેલ કરવા જોઇએ.
નોંધઃ આ લેખ માત્ર સામાન્ય જાણકારી માટે છે, તે કોઇ પણ પ્રકારે દવા કે ઇલાજનો વિકલ્પ હોઇ શકે નહીં. વધુ માહિતી માટે તમારાં ડોક્ટરનો સંપર્ક કરો.
આ સમાચારને અંગ્રેજીમાં વાંચવા માટે અહીં ક્લિક કરો.