યુવતીને એક વર્ષથી કમરમાં થઈ રહ્યો હતો દુ:ખાવો, બધા ટેસ્ટ કરાવ્યા તો ખબર પડી કે...

લંડન: યુકેમાં રહેતી 20 વર્ષની લૂઈસ પાર્કરને કમરમાં દુ:ખાવો રહ્યા કરતો હતો. તેણે આ અંગે પોતાના ફેમિલી ડોક્ટરની પણ સલાહ લીધી. જોકે, ફેમિલી ડોક્ટર તો તેને એમ જ કહેતા રહ્યા કે તેને સાયટીકા (જેને ગુજરાતીમાં રાંઝણ)ની સમસ્યા છે. છેક એપ્રિલ 2018થી કમરના દુ:ખાવાથી પીડાઈ રહેલી લૂઈસ માટે હવે આ પેઈન અસહ્ય થઈ રહ્યું હતું, અને આખરે તેણે ડૉક્ટર બદલવાનો નિર્ણય કર્યો. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો પોતાને સાયટીકા કરતાં કંઈક બીજી જ ગંભીર બીમારી થઈ છે તેવો અંદાજ લૂઈસને પહેલાથી જ આવી ગયો હતો. તેણે ગૂગલ પર આ અંગે સર્ચ કર્યું અને અન્ય એક ડૉક્ટરની સલાહ લીધી. બે વર્ષની દીકરીની માતા એવી લૂઈસના બધા રિપોર્ટ્સ જોયા બાદ ડૉક્ટરે જે નિદાન કર્યું તે જાણીને લૂઈસના પગ નીચેથી જમીન ખસી ગઈ. ડૉક્ટરે લૂઈસને જણાવ્યું કે તેને અત્યંત દુર્લભ કહેવાય એવું ન્યૂરોબ્લાસ્ટોમા કેન્સર થયું છે. આ કેન્સર પાંચ વર્ષથી ઓછી ઉંમરના બાળકોમાં જ થાય છે. યુકે જેવા દેશમાં દર વર્ષે 100 જેટલા બાળકો તેનો ભોગ બને છે. આ કેન્સર દર 20 લાખે માંડ એકાદ પુખ્ત વયના વ્યક્તિને થાય છે. જો તેને આ કેન્સર થયાનું નિદાન પહેલા જ થઈ ગયું હોત તો કદાચ તે આટલું ગંભીર ન બન્યું હોત. પોતાને આ મહારોગ થયા બાદ લૂઈસ બીજા લોકોને સલાહ આપતા કહે છે કે, તમે આવતીકાલે કેન્સરનો ભોગ નહીં બનો તેની કોઈ ગેરંટી નથી. જેમ તમે ડ્રાઈવ કરતાં હોય ત્યારે ગમે તેટલું ધ્યાન રાખવા છતાં પણ ક્યારેક એક્સિડેન્ટ થઈ શકે તે જ રીતે કેન્સર પણ ગમે તેને ગમે ત્યારે થઈ શકે. પોતાની બે વર્ષની દીકરીથી લૂઈસ તેની બીમારી છૂપાવવા તમામ પ્રયાસ કરી રહી છે, પરંતુ દિવસેને દિવસે તે અઘરું થઈ રહ્યું છે.