બનાવતા શીખો ચીઝ કોર્ન પાણીપૂરી, આ વેરાયટી પહેલા તમે ક્યારેય નહીં ટ્રાય કરી હોય

જો તમને પાણીપૂરી ખૂબ જ ભાવતી હોય તો ચીઝ અને કોર્નના ફ્યૂઝનવાળી પાણીપૂરી ચોક્કસથી ભાવશે. સોજી અને ઘઉંના લોટ સહિતની અન્ય સામગ્રીમાંથી બનતી પાણીપૂરીનો સ્વાદ તમારા જીભને ગમી જશે. કિટ્ટી પાર્ટી હોય, બર્થ ડે પાર્ટી હોય કે પછી ગેટ-ટુ-ગેધર તમે આ પાણીપૂરી જો મહેમાનને ખવડાવશો તો તેઓ પણ ખુશ થઈ જશે. (Recipe: Chef Ashish Srivastava, Executive Chef, Regenta LP Vilas, Dehradun)

સામગ્રી
250 ગ્રામ સોજી
1/2 ટે. સ્પૂન બેકિંગ પાઉડર
150 ગ્રામ બાફેલી અમેરિકન મકાઈના દાણા
20 ગ્રામ સમારેલી કોથમીર
2 ટે. સ્પૂન લીંબૂનો રસ
1 ટે. સ્પૂન મીઠું
જરૂર મુજબ પાણી
125 ગ્રામ ઘઉંનો લોટ
2 ટે. સ્પૂન તેલ
2 નંગ સમારેલા લીલા મરચાં
2 ટે. સ્પૂન માયોનીઝ
3 ગ્રામ દળેલી ખાંડ
50 ગ્રામ છીણેલું ચીઝ
તળવા માટે તેલ

સ્ટેપ 1
આ ફ્યૂઝન સ્ટ્રીટ ફૂડ બનાવવા માટે સૌથી પહેલા એક બાઉલ લો. તેમાં સોજી, ઘઉંનો લોટ, તેલ, બેકિંગ પાઉડર, 1/2 ટે. સ્પૂન મીઠું લો. બધી સામગ્રીને સરસ રીતે મિક્સ કરી લો. થોડું-થોડું પાણી રેડતા જઈને ઢીલી પણ નહીં અને કઠણ પણ નહીં તેવી કણક બાંધી લો.

સ્ટેપ 2
કણક બંધાઈ જાય એટલે 5થી 10 મિનિટ તેને રેસ્ટ આપો. બાદમાં તેમાંથી નાના-નાના બોલ્સ બનાવી લો અને વણી લો.

સ્ટેપ 3
એક પેનમાં તેલ ગરમ કરવા મૂકો. તેલ ગરમ થાય એટલે પૂરીને તેમાં ગોલ્ડન બ્રાઉન કલરની થાય તેવી તળી લો.

સ્ટેપ 4
એક બાઉલ લો. તેમાં માયોનીઝ, દળેલી ખાંડ, લીંબૂનો રસ, સમારેલી કોથમીર, સમારેલા લીલા મરચા, બાફેલી અમેરિકન મકાઈના દાણા અને 1/2 ટે. સ્પૂન મીઠું ઉમેરો અને મિક્સ કરો.

સ્ટેપ 5મિશ્રણને બનાવેલી પૂરીમાં થોડું-થોડું ભરી લો. તેને છીણેલા ચીઝથી ગાર્નિંશ કરો અને તરત જ સર્વ કરો.