આ રીતે ઘરે જ બનાવો ફરાળી ઉત્તપમ, ઉપવાસમાં ઘરના બધાને મજા પડી જશે

I am Gujarat

આ ફરાળી આઈટમ તમે હજુ ટ્રાય નહીં કરી હોય

શ્રાવણ માસ નજીક આવી રહ્યો છે એ સાથે જ અનેક તહેવારો પણ શરુ થઈ ગયા છે. જેમાં ઉપવાસ અને એકટાણાનું મહત્વ વધારે હોય છે. ત્યારે દર વખતની જેમ એકની એક ફરાળી આઈટમથી કંટાળો આવતો હોય તો આ વખતે કંઈક નવું અલગ ટ્રાય કરો. આજે અમે તમને જણાવીશું ફરાળી ઉત્તપમ બનાવવાની સહેલી રીત. જેને ખાઈને ઘરના લોકો બોલી ઉઠશે ઈસ્ટ ઓર વેસ્ટ યુ આર ધ બેસ્ટ.

એકવાર ટ્રાય કરો

ફરાળી ઉત્તપમ ખૂબ જ સહેલાઈથી અને ફટાફટ બની જતી ફરાળી ડિશ છે. માત્ર 20 મિનિટમાં બનતા આ ઉત્તપમ સ્વાદમાં પણ એટલા જ લિજ્જતદાર છે અને ઘરમાં બધાંને ભાવશે.

ફરાળી ઉત્તપમ માટે સામગ્રી

1 વાટકી રાજગરાનો લોટ સ્વાદ અનુસાર સિંધવ મીઠું 1 ચપટી મરી પાવડર અડધી વાટકી છાશ 1 ઝીણું સમારેલું લીલું મરચું 1 બટાકાના નાના-નાના ટુકડા ઝીણી સમારેલી કોથમીર

બનાવવાની રીત

સૌપ્રથમ ઉત્તપમનું ખીરું બનાવવા માટે બાઉલમાં 1 વાટકી રાજગરાનો લોટ લઈ અંદર અડધી વાટકી છાશ, સ્વાદ અનુસાર સિંધવ મીઠું અને જરૂર મુજબ પાણી ઉમેરો. ત્યારબાદ અંદર મરી પાવડર નાખી હલાવીને ઢોસા જેવું ખીરું બનાવી લો.

20 મિનિટમાં તૈયાર છે ટેસ્ટ ઉત્તપમ

બીજા એક બાઉલમાં ઝીણી સુધારેલી કોથમીર, બટાકું અને લીલું મરચું સુધારીને મિશ્રણ તૈયાર રાખવું. ખીરું થોડીવાર ઢાકી રાખ્યા બાદ નોનસ્ટિક તવા પર આ ખીરું પાથરી ઉપર સલાડ ભભરાવો. ઉત્તપમને આછું ગુલાબી શેકી લો. લો તૈયાર છે મોઢામાં પાણી લાવે તેવું ફરાળી ઉત્તપમ. તેને ગ્રીન ચટણી સાથે સર્વ કરી શકો છો. સૌજન્યઃ JOOS Food – Ethnic(Youtube)