રેસ્ટોરાંમાં મળે તેવા ચીઝ ઢોસા હવે આ સરળ રીતથી ઘરે બનાવો

સાઉથ ઈન્ડિયન ફૂડ મોટાભાગના લોકોને ભાવતું હોય છે. તેમાય ઢોસા તો લોકોના દિલમાં ખાસ સ્થાન ધરાવે છે. આપણે ત્યાં અલગ-અલગ પ્રકારના ઢોસા મળવા લાગ્યા છે. આજે અમે પણ તમને ઢોસાની એક અલગ વેરાયટી બનાવતા શીખવીશું, જે છે ચીઝ ઢોસા. આ ઢોસામાં ચીઝ મુખ્ય સામગ્રી હોવાથી નાના બાળકોને પણ ખૂબ ભાવશે. તો જોઈ લો રેસિપી.

સામગ્રી
2 કપ ચોખા
1/2 કપ અડદની દાળ
2 ચમચી મેથીના દાણા
100 ગ્રામ ચીઝ
6 નંગ બારીક સમારેલા લીલા મરચા
જરૂર મુજબ તેલ
1 ચમચી સમારેલી કોથમી
2 નંગ બારીક સમારેલી ડુંગળી
સ્વાદાનુંસાર મીઠું

સ્ટેપ 1
ચોખા અને અડદની દાળને સારા પાણીથી ધોઈને અલગ-અલગ બાઉલમાં 5-6 કલાક માટે પલળવા મૂકી દો. મેથીના દાણાને 15 મિનિટ માટે પલાળવા મૂકો. ચોખા, અડદની દાળ અને મેથીના દાણામાંથી પાણી કાઢીને બ્લેન્ડર જારમાં લઈ લો. તેને કરકરુ ક્રશ કરી લો.

સ્ટેપ 2
આ મિશ્રણને એક બાઉલમાં લઈ લો અને તેને ઢાંકીને ફરીથી 2-3 કલાકનો રેસ્ટ આપો. આમ કરવાથી તેમા સરસ આથો આવી જશે. હવે તેમાં જરૂર મુજબ પાણી ઉમેરીને ખીરું તૈયાર કરો. બાદમાં તેમાં મીઠું ઉમેરીને સરસ રીતે મિક્સ કરી લો.

સ્ટેપ 3
ઢોસા બનાવવાની પેન લો. તેમાં પણ થોડું તેલ લગાવીને એક ચમચો ઢોસાનું ખીરું પાથરી લો. જ્યારે તે થોડું ક્રિસ્પી થાય એટલે તેની ઉપર સમારેલી ડુંગળી, છીણેલું ચીઝ અને કોથમીર પાથરી દો. ઉપરથી થોડા લીલા મરચા પણ ઉમેરો. તો લો તૈયાર છે ચીઝ ઢોસા. આ ઢોસાને નારિયેળની ચટણી અને સાંભાર સાથે સર્વ કરો.