સામગ્રીમાં માત્ર ત્રણ વસ્તુનો ઉપયોગ કરીને બનાવો ચોકલેટ કોકોનટ બાર!

ચોકલેટ એવી વસ્તુ છે બાળકોને ખૂબ જ ભાવે છે. વિવિધ પ્રકારની ચોકલેટ જોઈને બાળકો શું મોટાઓના મોંમાં પણ પાણી આવી જાય છે. અહીં તમને ચોકલેટની એક નવી વેરાયટિ બનાવતા શીખવીશું જે તમે કદાચ બહારથી લાવીને ખાતા હશો. ચોકલેટ કોકોનટ બાર સાવ ઓછી સામગ્રીમાં તૈયાર થઈ જાય છે. આ રેસિપી બનતા 20 મિનિટ જેટલો જ સમય લાગે છે. ચોકલેટ અને કોપરાની છીણનું કોમ્બિનેશન ખૂબ જ સરસ લાગશે. આ રેસિપીમાં કૂકિંગ કે બેકિંગની માથાકૂટમાં પડવાનું નથી. ત્યારે બાળકો જાતે પણ આ રેસિપી બનાવી શકે છે. આ ચોકલેટમાં સ્વીટનેસ એડ કરવા માટે તમારે ખાંડ ઉમેરવાની પણ જરૂર નથી કારણકે કન્ડેન્સ મિલ્ક તે જરૂર પૂરી કરશે. તો જોઈ લો યમ્મી ચોકલેટ કેવી રીતે બનાવશો.

સામગ્રી

1 કપ છીણેલું ટોપરું
અડધો કપ કન્ડેન્સ મિલ્ક
1/2 ટીસ્પૂન ઈલાયચી પાઉડર
1 કપ કમ્પાઉન્ડ ચોકલેટ

બનાવવાની રીત

એક બાઉલમાં છીણેલું ટોપરું, કન્ડેન્સ મિલ્ક અને ઈલાયચી પાઉડર લો. આ ત્રણેયને બરાબર મિક્સ કરી લો. બેકિંગ ટ્રેમાં આ મિશ્રણને એવી રીતે પાથરો કે જાડાઈ અડધો ઈંચ જેટલી રહે. 10 મિનિટ માટે આ મિશ્રણને ફ્રિજમાં સેટ થવા મૂકી દો.

બનાવવાની રીત

મિશ્રણ સેટ થઈ ગયા પછી તેના ચોરસ ટુકડા કાપી લો. હવે મેલ્ટ (પીગાળેલી) ચોકલેટને એક બાઉલમાં કાઢો. તૈયાર કરેલા ચોરસ બારને ચોકલેટમાં બોળી લો. આખા બાર પર ચોકલેટ બરાબર ચઢી જાય તે સુનિશ્ચિત કરવું. આ રીતે બધા જ બારને ચોકલેટમાં ડીપ કર્યા પછી 5 મિનિટ માટે ફ્રિજમાં મૂકી દો. બસ તૈયાર છે ટેસ્ટી ચોકલેટ કોકોનટ બાર. (રેસિપી- ઈન્ડિયન ઝાયકા)