સગાઈ તૂટી તો શું થયું? તમે અંદરથી તૂટશો નહીં

એ વાતથી કોઈ ફરક નથી પડતો કે સગાઈ તોડી નાખવાનો નિર્ણય કોનો છે? આ નિર્ણયથી તમારી અંદર ગુસ્સો, અપમાન જોવા મળી શકે છે. તમે જ્યાં સુધી એ વાતને સ્વીકારશો નહીં કે સગાઈ તૂટી જ ગઈ છે ત્યાં સુધી આ દુ:ખમાં વધારો થતો રહેશે. સગાઈ તૂટી જવાના કારણે તમે ભલે દુ:ખી છો પણ તે વાસ્તવિકતાને સ્વીકારવી જોઈએ કે આ સંબંધ તમારા માટે નહોતો. સારુ થયું કે લગ્ન પહેલા સગાઈ તૂટી ગઈ, નહીં તો ખબર નથી કે આગળ જતા શું થવાનું છે.

સગાઈ તૂટી જવાની દુ:ખદ ઘટના પછી તમને સંભાળવા માટે તમારી સાથે મિત્રો, સંબંધીઓ અને માતા-પિતા હોય જ છે. પણ, સાથે-સાથે પોતાની જાતને સંભાળવી ખૂબ જરૂરી છે. જ્યારે તમે પોઝિટિવ એટલે કે સકારાત્મક વિચારશો ત્યારે તમને આ કામમાં સફળતા મળશે. પોતાને એ વાત સમજાવવી જરૂરી છે કે સગાઈ તૂટી જવી તે દુનિયાનો અંત નથી. દુ:ખી થશો નહીં અને વિચારો કે હવે તમે આ ઘટના પછી કેટલા મજબૂત થશો. લોકોને જુઓ અને તેઓને જાણવાનો પ્રયાસ કરો. સગાઈ તૂટી ગયા પછી ક્યારેય તે ઘટનાને યાદ કરીને રડશો નહીં. તમારા આગામી જીવન પર આ ઘટનાની કોઈ અસર થવી જોઈએ નહીં.

જો સગાઈ તૂટવાના દુ:ખમાંથી બહાર નીકળવા માટે તમે પોતાની સંભાળ લઈ રહ્યા છો તો તેમાં કશું ખોટું નથી. તમે દોસ્તોની સાથે નાનકડા વેકેશન પર જઈ શકો છો. એકલા-એકલા પણ ફરવા માટે જઈ શકો છો એટલે કે સોલો ટ્રિપ પણ કરી શકો છો. તમને કંગના રનૌતની ફિલ્મ 'ક્વીન' તો યાદ હશે જ. સગાઈ તૂટવાના દુ:ખમાંથી બહાર નીકળવા માટે તમે પોતાની લાઈફસ્ટાઈલમાં બદલાવ લાવી શકો છો. તમને પોતાની જે વસ્તુ ખાસ લાગતી હોય તે કરવાથી સગાઈ તૂટવાના દુ:ખમાંથી જલદી બહાર આવી જશો.