Garba Craze :કેનેડા, ઓસ્ટ્રેલિયા, દુબઈ, અમેરિકા...આ નવરાત્રિમાં દુનિયાભરમાં છે ગરબા ટ્રેનર્સની બોલબાલા
નવરાત્રિની ઉજવણી માત્ર ગુજરાતમાં કે દેશમાં જ નહીં, વિદેશમાં પણ ધામધૂમથી થતી હોય છે. નવરાત્રિના સમયે વિદેશના આયોજકો પણ ભારતથી ગરબા સિંગર્સને બોલાવતા હોય છે. આટલુ જ નહીં, અહીંથી ગરબા શીખવાડનારા ટ્યુટર્સને પણ તેઓ બોલાવતા હોય છે અને ક્લાસિસનું આયોજન કરવામાં આવે છે. અમદાવાદમાં પણ આ વખતે ગરબા શીખનારા લોકોની સંખ્યામાં 3 ગણો વધારો થયો છે.
અમદાવાદ- ગરબા શબ્દ સંભળાય તો સાથે જ એક બીજો શબ્દ જોડાય- ગુજરાત. પણ ગરબાના શોખીનો માત્ર ગુજરાતમાં જ નથી, દુનિયાભરમાં નવરાત્રિનો આ પર્વ ધામધૂમથી ઉજવવામાં આવે છે. નવરાત્રિમાં જેમ દુનિયાભરમાં ગીતકારો અને સેલેબ્સની માંગ વધી જાય છે, તેમ હવે તો ગરબા શીખવાડનારા ટ્રેનર્સની પણ ખૂબ બોલબાલા હોય છે. સુરતના ડાન્સ અને ગરબા કોરિયોગ્રાફર ધ્રુવ ડોક્ટર જણાવે છે કે તે તાજેતરમાં જ દુબઈથી પાછા ફર્યા છે. તે ગરબા વર્કશોપ માટે દુબઈ ગયા હતા.
અમારા સહયોગી ટાઈમ્સ ઓફ ઈન્ડિયા સાથેની વાતચીતમાં તેમણે જણાવ્યું કે, દુબઈમાં ગરબા વર્કશોપ કરવા માટેની આ બીજી ટ્રિપ છે. કોરોના મહામારીને કારણે બે વર્ષ પછી આ તહેવાર પહેલાની જેમ ધૂમધામથી ઉજવાઈ રહ્યો છે, માટે લોકોમાં આતુરતા પણ ઘણી વધારે છે. લોકોમાં આ વર્ષે બમણો ઉત્સાહ અને ખુશી છે. હું ભારતના અન્ય ભાગોમાં પણ ગરબા શીખવાડવા માટે જઉ છું. અમદાવાદના એક કોરિયોગ્રાફર જણાવે છે કે, ભારતના અન્ય રાજ્યોમાં પણ કોરિયોગ્રાફર્સની ઘણી માંગ છે. ઓગસ્ટ અને સપ્ટેમ્બર મહિનામાં મેં બેંગ્લોર અને ચેન્નાઈ જઈને ગરબા વર્કશોપનું આયોજન કર્યુ હતું. આ તહેવાર હવે ગુજરાત પૂરતો સીમિત નથી. દેશભરના લોકો તેમાં ભાગ લઈ રહ્યા છે અને નવા નવા સ્ટેપ્સ શીખવાનો પ્રયત્ન કરી રહ્યા છે.
ઘણાં બધા કલાકારો બેન્ડ સાથે અથવા સ્વતંત્ર રીતે અમેરિકા, યુકે, ઓસ્ટ્રેલિયા, કેનેડા અને યુએઈ જેવા દેશોમાં નવરાત્રિની ઈવેન્ટમાં પર્ફોર્મ કરવા માટે જાય છે. ભારતમાં પણ મોટી સંખ્યામાં ખેલૈયાઓ ગરબા ક્લાસમાં જોડાય છે અને વેન્યૂ પર ગ્રુપમાં પર્ફોર્મ કરવા પહોંચે છે. અમદાવાદ શહેરમાં ગરબા ક્લાસ ચલાવતા ભાવિન ઠાકર જણાવે છે કે, આ વર્ષે 900થી વધારે લોકો ગરબા શીખવા માટે આવ્યા હતા. આ સંખ્યા 2019ની સરખામણીમાં 3 ગણી વધારે છે. આ પહેલા અમને ગરબાના આયોજકો તરફથી આમંત્રણ મળતુ હતું અને અમે તેમના વેન્યુ પર ગ્રુપ પર્ફોમન્સ માટે જતા હતા. આ વખતે સ્થિતિ એવી છે કે વેન્યુની પસંદગી અમે કરી રહ્યા છીએ.
મંગળવારના રોજ અમદાવાદના અમુક વિસ્તારોમાં એકાએક વરસાદ પડ્યો હતો, પણ તેનાથી ખેલૈયાઓનો જોશ ઓછો નહોતો થયો. અમુક વેન્યુ પર નુકસાન થયુ હતું, પણ આયોજકોએ સાંજ સુધીમાં મેદાન સાફ કરાવી દીધા હતા. એક આયોજક મનોજ ચૌધરી જણાવે છે કે, એસજી હાઈવે, સિંધુ ભવન રોડ અને એસપી રિંગ રોડ પર વરસાદ નહોતો પડ્યો એ સારી વાત હતી.