US visa: અમેરિકન વિઝા માટે 500 દિવસ સુધી એપોઈન્ટમેન્ટ નથી મળતી, છેક 2024માં વારો આવશે

અમેરિકન વિઝા (US Visitor Visa) મેળવવાની પ્રક્રિયા પહેલેથી અત્યંત લાંબી અને થકવી નાખનારી રહી છે, હવે આ પ્રોસેસમાં વિલંબ ઘણો વધી ગયો છે. એક અંદાજ પ્રમાણે સરેરાશ વિઝા અરજી માટે વેઈટિંગનો ગાળો વધીને 500 દિવસ (લગભગ દોઢ વર્ષ)નો થયો છે. અત્યારે તમે યુએસ વિઝા માટે અરજી કરો તો છેક 2024ની એપોઈન્ટમેન્ટ (US Visa Appointment) મળે છે. તેના કારણે અમેરિકાની ટ્રિપ કરવા માંગતા ભારતીયોની મુશ્કેલી વધી ગઈ છે. કોવિડના નિયંત્રણો હળવા થયા પછી ઇન્ટરનેશનલ ફ્લાઈટ્સ શરૂ થઈ છે. અત્યારે મોટી સંખ્યામાં ભારતીયો USA જવા માંગે છે, પરંતુ તેમને ઝડપથી વિઝા મળે તેમ નથી.

US સ્ટેટ ટ્રાવેલની વેબસાઈટ પ્રમાણે નવી દિલ્હી ખાતે US કોન્સ્યુલેટમાં વિઝા મેળવવાની એપોઈન્ટમેન્ટ 582 દિવસ પછી મળે છે. સ્ટુડન્ટ વિઝા માટે 471 દિવસ પછીની એપોઈન્ટમેન્ટ મળે છે. મુંબઈમાં US વિઝા એપોઈન્ટમેન્ટ માટે સરેરાશ વેઈટ ટાઈમ 517 દિવસનો છે જ્યારે સ્ટુડન્ટ વિઝા (Student Visa) માટે 10 દિવસનો છે. હૈદરાબાદમાં સામાન્ય વિઝા માટે 518 દિવસ પછીની એપોઈન્ટમેન્ટ મળે છે, જ્યારે સ્ટુડન્ટ વિઝા માટે 479 દિવસ રાહ જોવી પડશે.

કોલકાતામાં US વિઝા માટે 587 દિવસની રાહ જોવી પડે છે, જ્યારે સ્ટુડન્ટ વિઝા માટે બે દિવસનો વેઈટિંગ પિરિયડ છે. ચેન્નાઈમાં વિઝિટર વિઝા માટે 513 દિવસની રાહ જોવી પડે છે જ્યારે સ્ટુડન્ટ વિઝા માટે 8 દિવસ પછીની એપોઈન્ટમેન્ટ મળે છે. અમેરિકન સરકારના અધિકારીએ જણાવ્યું કે કોવિડના કારણે બે વર્ષ સુધી કોન્સ્યુલેટ (US Consulate)ની ઘણી કામગીરી અટકી ગઈ હતી. હવે કોવિડનું જોખમ ઓછું થયું છે, પરંતુ કામનો ભરાવો થયો છે. તેમણે કહ્યું કે કોવિડ વખતે અમે કામ સાવ બંધ કરી દીધું હતું. હવે એક વર્ષ કરતા વધુ રાહ જોવી પડે છે. 9-11ના આતંકવાદી હુમલા પછીની સ્થિતિ કરતા પણ અત્યારે વગારે ગંભીર સ્થિતિ છે.

બીજા દેશો માટે વેઇટિંગનો સમયગાળો વધ્યોભારતીયોએ માત્ર અમેરિકા જવા માટે દોઢ વર્ષની રાહ જોવી પડે છે એવું નથી. હાલની સ્થિતિ પ્રમાણે યુકે, શેનઝેન વિઝા અને કેનેડાના વિઝા માટે પણ વેઇટિંગ પિરિયડ વધી ગયો છે. ઉદાહરણ તરીકે યુકેના વિઝા માટે વેઇટિંગનો ગાળો ચારથી 10 અઠવાડિયા વધી ગયો છે. જર્મની હાલમાં પરમેનન્ટ સ્ટે વિઝાની અરજી સ્વીકારતું નથી. તાજેતરમાં ભારત ખાતે ડેન્માર્કના દૂતાવાસે જાહેરાત કરી હતી કે તેણે શોર્ટ-સ્ટે વિઝા અને રેસિડન્સ પરમિટની અરજીઓ સસ્પેન્ડ કરી છે.