સિંગાપોરે પ્રોફેશનલ લોકો માટે નવી વર્ક પરમિટ શરૂ કરીઃ તમને પણ ચાન્સ મળી શકે

Work permit in Singapore: એશિયાના સૌથી સમૃદ્ધ દેશોમાં સિંગાપોર ટોચ પર છે અને સિંગાપોરમાં કામ કરવા મળે અથવા રહેવા મળે તો તે ખરેખર ઉત્તમ તક ગણાય છે. સિંગાપોરે ગયા અઠવાડિયે ઓવરસિઝ નેટવર્ક્સ એન્ડ એક્સપર્ટાઈઝ (ONE) નામે એક નવી વર્ક પરમિટ શરૂ કરી છે જેના કારણે કંપનીઓ સરળતાથી વિદેશી કર્મચારીઓને નોકરી પર રાખી શકશે. નવી વર્ક પરમિટ પ્રમાણે દર મહિને ઓછામાં ઓછા 30,000 સિંગાપોર ડોલરની આવક ધરાવતા વિદેશીઓ પાંચ વર્ષનો વર્ક પાસ મેળવી શકશે અને તેમના આશ્રિતો પણ સિંગાપોરમાં રોજગાર શોધી શકશે. એક સિંગાપોર ડોલરની કિંમત લગભગ 57 રૂપિયા જેટલી થાય છે.

જે લોકોનો પગાર આટલો બધો ઉંચો નથી, પરંતુ સ્પોર્ટ્સ, આર્ટ્સ, સાયન્સ અને શૈક્ષણિક ક્ષેત્રે મોટી સિદ્ધિ મેળવી હોય તેવા લોકો પણ આ સુવિધા હેઠળ અરજી કરી શકે છે. જોકે, આ માટેના ધોરણો હજુ જાહેર કરવામાં આવ્યા નથી. સિંગાપોરના મેનપાવર મિનિસ્ટર તાન સી લેંગે જણાવ્યું કે બિઝનેસ જગત તથા પ્રતિભાશાળી લોકો રોકાણ કરવા, વસવાટ કરવા અને કામ કરવા માટે સુરક્ષિત અને સ્થિર જગ્યાની શોધમાં છે. સિંગાપોર જગ્યા જ એવી છે.

નવી વર્ક પરમિટ પહેલી જાન્યુઆરી, 2023થી અમલમાં આવશે. તેના નિયમો આ મુજબ રહેશેઃ

લાયકાતના ધોરણોઃ
હાલમાં વર્ક પાસ ધરાવતા લોકો અને વિદેશી ઉમેદવારો નીચેની કોઈ પણ શરતનું પાલન કરતા હશે તો તેઓ અરજી કરી શકશેઃ
- છેલ્લા એક વર્ષમાં તેમનો ફિક્સ્ડ સેલેરી 30,000 સિંગાપોર ડોલર અથવા વિદેશી ચલણમાં તેની સમકક્ષ હોવો જોઈએ.
- સિંગાપોરમાં ભવિષ્યના એમ્પ્લોયર હેઠળ ઓછામાં ઓછા 30,000 સિંગાપોર ડોલરનો ફિક્સ્ડ માસિક પગાર હોવો જોઈએ.
આ ઉપરાંત વિદેશી કંપનીએ સ્થાપિત કરી દેખાડવું પડશે કે તેઓ છેલ્લા એક વર્ષથી કોઈ એસ્ટાબ્લિશ્ડ કંપની માટે કામ કરી રહ્યા છે અથવા સિંગાપોરમાં એસ્ટાબ્લિશ્ડ કંપની સાથે કામ કરે છે.

એસ્ટાબ્લિશ્ડ કંપની કોને કહેવાય?
કોઈ કંપનીને એસ્ટાબ્લિશ્ડ ગણાય કે નહીં તે જાણવા માટે તેની માર્કેટ કેપિટલ ઓછામાં ઓછા 50 કરોડ ડોલરની હોવી જોઈએ અથવા તેની વાર્ષિક રેવન્યુ ઓછામાં ઓછા 20 કરોડ ડોલરની હોવી જોઈએ.

ONE પાસને રિન્યુ કરી શકાય કે નહીં?
ઓવરસિઝ નેટવર્ક્સ એન્ડ એક્સપર્ટાઇઝ (ONE) પાસને દર પાંચ વર્ષે રિન્યુ કરી શકાય છે. રિન્યુઅલને પાત્ર બનવા માટે પાસ હોલ્ડરે નીચેની શરતોનું પાલન કરવું જોઈએ.
- છેલ્લા પાંચ વર્ષમાં સિંગાપોરમાં તેમનો માસિક ફિક્સ્ડ પગાર ઓછામાં ઓછા 30,000 ડોલર હોવું જોઈએ.
- સિંગાપોરમાં કંપની ચલાવતા હોવા જોઈએ જેમાં ઓછામાં ઓછા પાંચ લોકલ વ્યક્તિને રોજગારી મળતી હોય અને બધાની આવક ઓછામાં ઓછા 5000 સિંગાપોર ડોલરથી વધારે હોય. આ ઉપરાંત તમે તમારા સંતાનોને પણ સિંગાપોર લાવી શકો છો. સંતાનની ઉંમર 21 વર્ષથી ઓછી હોવી જોઈએ. લોંગ ટર્મ વિઝા પાસ માટે વિકલાંગ સંતાનની ઉંમર 21 વર્ષથી વધારે હોય તો પણ મંજૂરી અપાશે.