Study in Germany: ભારતીય સ્ટુડન્ટ્સમાં જર્મની આટલું બધું લોકપ્રિય કેમ બન્યું?

વિદેશમાં શિક્ષણ મેળવવાનો ટ્રેન્ડ વધી રહ્યો છે અને વધુને વધુ ભારતીય વિદ્યાર્થીઓ હાયર એજ્યુકેશન માટે USA, UK, કેનેડા, જર્મની અને ઓસ્ટ્રેલિયા જેવા દેશોમાં જઈ રહ્યા છે. છેલ્લા કેટલાક વર્ષોમાં તમામ દેશના સ્ટુડન્ટ્સમાં જર્મનીની લોકપ્રિયતામાં વધારો થયો છે. બીજા બધા દેશોમાં અંગ્રેજી ભાષાનું ચલણ હોવાથી તેમની લોકપ્રિયતા પહેલેથી હતી, પણ હવે જર્મની પણ ફેવરિટ બન્યું છે. વિદેશ મંત્રાલયના આંકડા પ્રમાણે હાલમાં 21,000 ભારતીય વિદ્યાર્થીઓ જર્મનીમાં ભણે છે.

હાયર એજ્યુકેશન માટે જર્મનીને પસંદ કરવાના કેટલાક કારણો છે.
તમને સ્કોલરશિપ જોઈતી હોય, વધારે ઊંચી ફી ભરવી ન હોય, એજ્યુકેશન માટે ઊંચી લોન લેવી ન હોય તો એવો દેશ પસંદ કરો જ્યાં શિક્ષણની ક્વોલિટી બહુ સારી હોય અને જોબ પણ પુષ્કળ પ્રમાણમાં મળી રહે. જર્મની આવો જ એક દેશ છે. 2020માં જર્મનીમાં 3થી 5 લાખ વિદેશી વિદ્યાર્થીઓ અભ્યાસ કરવા માટે આવ્યા હતા.

જર્મનીમાં એજ્યુકેશનના ફાયદા આ મુજબ છેઃ

1) ફ્રી અથવા ઓછા ખર્ચે એજ્યુકેશન
જર્મની ફ્રી એજ્યુકેશનને મૂળભૂત માનવ અધિકાર માને છે. તેથી જાહેર એજ્યુકેશન સંસ્થાઓમાં કોઈ ફી લેવામાં આવતી નથી. આમ કરવાથી લોકોનું કલ્યાણ થાય છે અને ઇકોનોમીને ફાયદો થાય છે તેવું જર્મની માને છે. વિદેશી સ્ટુડન્ટને પણ આ લાભ મળે છે. જોકે, સેમેસ્ટર કન્ટ્રીબ્યુશન તરીકે 100થી 350 યુરો ચુકવવા પડે છે. આ ઉપરાંત અહીંની યુનિવર્સિટીઓમાં પ્રેક્ટિકલ પર વધુ ભાર મુકાય છે તેથી એજ્યુકેશનનો સ્તર ઘણો ઊંચો છે.

2) અંગ્રેજીમાં પણ ભણી શકાય
જર્મન ભાષા આવડતી હોય તો જર્મનીમાં કામ ઘણું સરળ થઈ જાય, પરંતુ અહીં અંગ્રેજી ભાષામાં પણ ઘણી યુનિવર્સિટીઓમાં કોર્સ ઓફર થાય છે. તેમાં સોશિયલ સાયન્સ, એન્જિનિયરિંગ, નેચરલ સાયન્સ, ઇકોનોમિક્સ, લો, ગણિત ભણાવવામાં આવે છે. તેના માટે એડમિશન વખતે IELTS અને TOEFL સ્કોર માંગવામાં આવે છે.

3) સ્કોલરશિપ અને પાર્ટટાઈમ જોબ કરો
સમગ્ર યુરોપમાં જર્મનીમાં સૌથી નીચા ખર્ચે ભણી શકાય છે. આ ઉપરાંત સરકારી અને પ્રાઈવેટ સંસ્થાઓ દ્વારા સ્કોલરશિપ ઓફર કરાય છે. વિદ્યાર્થીઓ પોતાનો રહેવા-જમવાનો ખર્ચ ઉઠાવવા માટે પાર્ટ ટાઈમ જોબ કરી સકે છે. તેઓ ફ્રીલાન્સિંગ નથી કરી શકતા પરંતુ એક વર્ષની અંદર 120 આખા દિવસ અથવા 240 અડધા દિવસ કામ કરી શકે છે. લેક્ચર ફ્રી પિરિયડ વખતે તેઓ યુનિવર્સિટીની રજાઓમાં પણ કામ કરી શકે છે. વિદેશી વિદ્યાર્થીઓને યુનિવર્સિટીમાં પણ કામ કરવાની છૂટ મળે છે જેમાં સારું એવું વેતન ચુકવાય છે.

4) જીવનનિર્વાહનો ઓછો ખર્ચબીજા યુરોપીયન દેશોની તુલનામાં જર્મનીમાં જીવનનિર્વાહનો ખર્ચ નીચો હોય છે. સ્ટુડન્ટ વિઝા માટે 75 યુરોની ફી લાગે છે. આ ઉપરાંત એક જર્મન બ્લોક્ડ એકાઉન્ટ ખોલાવવું પડે છે જેમાં દર વર્ષે 10,332 યુરો જમા હોવા જરૂરી છે. તેમાંથી તેઓ દર મહિને 861 યુરો ઉપાડી શકે છે. સ્ટુડન્ટને દર મહિને લગભગ 250થી 350 ડોલરનો ભાડાનો ખર્ચ આવે છે. આ ઉપરાંત તેમણે એક હેલ્થ ઇન્શ્યોરન્સ પોલિસી ખરીદવી પડે છે જે 100થી 150 યુરોનો ખર્ચ આવે છે. બીજી જરૂરી ચીજવસ્તુઓ માટે દર મહિને 100 યુરો જેટલો ખર્ચ આવે છે.