શોબિઝને અલવિદા કહેનારી સના ખાન હાલ પોતાના લગ્નના કારણે ચર્ચામાં છે. સના ખાને 20 નવેમ્બરના રોજ સુરતના અનસ સૈયદ સાથે નિકાહ કર્યા છે. નિકાહ બાદ સનાએ લાલ લહેંગામાં પોતાની સુંદર તસવીરો શેર કરી હતી. હવે તેણે મહેંદીની તસવીરો શેર કરી છે. 18 નવેમ્બરે યોજાયેલી મહેંદી માટે સનાએ પિંક અને ઓરેન્જ રંગના આઉટફિટ પર પસંદગી ઉતારી હતી.
સનાએ પોતાના મહેંદી લૂકને સ્ટાઈલિશ ચોકર, ઈયરિંગ્સ અને સિમ્પલ ટીકાથી પૂરો કર્યો હતો. સનાએ મહેંદીની વિવિધ તસવીરો શેર કરી છે. જેમાં કેટલીકમાં તે મહેંદી મૂકાવતી તો કેટલીક તસવીરોમાં મહેંદી બતાવતી જોવા મળે છે. સનાની મહેંદી માટે ઘર ફૂલોથી સજાવાયું હતું.
સના ખાને ઈન્સ્ટાગ્રામ સ્ટોરીમાં પણ પોતાની મહેંદીની કેટલીક તસવીરો શેર કરી છે. જેમાં તે પોતાની માતા સાથે જોવા મળે છે. દીકરીના લગ્નનો હર્ષ તેમના ચહેરા પર જોવા મળી રહ્યો હતો.
ઓક્ટોબર મહિનામાં સના ખાને ફિલ્મ ઈન્ડસ્ટ્રી છોડવાની જાહેરાત કરીને ફેન્સને આંચકો આપ્યો હતો. સનાએ ઈન્સ્ટાગ્રામ પર લાંબી પોસ્ટ મૂકીને માનવ જગતની સેવાની ઈચ્છા વ્યક્ત કરી હતી. સનાએ જણાવ્યું હતું કે, માનવતા અને ધર્મના માર્ગે ચાલવા માટે તે શોબિઝને લાઈફસ્ટાઈલને છોડી રહી છે.
લગ્ન બાદ સના ખાને પતિ સાથે પહેલી તસવીર શેર કરી હતી. આ તસવીર શેર કરતાં સનાએ લખ્યું હતું, "એકબીજાને પ્રેમ કર્યો અલ્લાહ માટે. એકબીજા સાથે લગ્ન કર્યા અલ્લાહ માટે. આ દુનિયામાં અલ્લાહ આપણને એકસાથે રાખે અને જન્નતમાં પણ આપણે સાથે રહીએ."