કચ્છના મુખ્ય મથક ભુજમાં વરસાદી માહોલ જોવા મળ્યો હતો. ભુજમાં બે કલાકમાં 2.5 ઈંચ, અંજારમાં 1.5 ઈંચ અને ગાંધીધામમાં 1 ઈંચ વરસાદ નોંધાયો હતો. વરસાદી માહોલથી રસ્તા પર પાણી ભરાયા હતા. ધોધમાર વરસાદના કારણે ભુજના પ્રમુખ સ્વામી નગર વિસ્તારમાં કેડસમા પાણી ભરાયા હતા. પ્રમુખ સ્વામી નગર વિસ્તારમાં લોકોના ઘરની અંદર પાણી ઘૂસ્યા હતા અને કેટલાંક વાહનો પાણીમાં અડધા ડૂબી ગયા હતા. ભુજમાં થોડા વિરામ બાદ વરસાદ વરસતા વાતાવરણમાં ઠંડક પ્રસરી હતી.
હવામાન વિભાગે રાજ્યમાં પાંચ દિવસ વરસાદની આગાહી કરી છે. સૌરાષ્ટ્ર, કચ્છમાં કેટલાક પંથકોમાં ભારેથી અતિભારે વરસાદની આગાહી છે. અમદાવાદ અને ગાંધીનગરમાં સામાન્યથી મધ્યમ વરસાદ થશે. રાજ્યમાં અત્યાર સુધી 122 ટકા વરસાદ થયો છે. રાજ્યમાં અનેક પંથકોમાં ભારેથી અતિભારે વરસાદને કારણે પાકને મોટું નુકસાન પહોંચ્યું છે.
ગઈકાલે અમદાવાદ અને ગાંધીનગર સહિતના વિસ્તારોમાં સાંજે ગાજવીજ સાથે વરસાદ પડ્યો હતો. એકાએક આવેલા આ વરસાદથી ભાદરવાની ગરમીથી અકળાઈ ગયેલા લોકોને રાહત થઈ. આ ઉપરાંત સૌરાષ્ટ્રના ગીરગઢડા, જસદણ, ધારી સહિતના પંથકમાં પણ આજે 1થી 3 ઈંચ વરસાદ પડ્યો હતો.