કોરોના પછી સરકારી નોકરી માટે ધસારો, આ રીતે લોકો કરે છે તૈયારી!

અંજલી વેણુગોપાલ/પ્રાચી વર્મા દધવાલ, નવી દિલ્હી: કોવિડ-19ને કારણે ઊભી થયેલી રોજગારીની અનિશ્ચિતતાને પગલે ઘણા લોકો હવે સરકારી નોકરી માટે સક્રિય બન્યા છે. બૈજુ, અડ્ડા247, ઓલિવરબોર્ડ, ટેસ્ટબૂક અને ઇક્સામ્બી જેવા ઓનલાઇન કોચિંગ પ્રોવાઇડર્સના જણાવ્યા અનુસાર સરકારી જોબ માટેની સ્પર્ધાત્મક પરીક્ષા માટેના કોચિંગ અને કોર્સિસમાં મોટો વધારો નોંધાયો છે.

કરિયર લોન્ચર જેવી ઓફલાઇન કોચિંગ કંપનીએ માંગને પહોંચી વળવા ઓનલાઇન ક્લાસમાં વધારો કર્યો છે. એડ-ટેક પ્લેયર અડ્ડા247 દ્વારા કરાયેલા 6,500 લોકોના સરવેમાં 72 ટકાએ સરકારી નોકરી માટે પ્રયાસનું સૌથી મહત્ત્વનું કારણ જોબ સિક્યોરિટી ગણાવી હતી.

અડ્ડા247ના સહસ્થાપક અનિલ નાગરે જણાવ્યું હતું કે, “સર્વિસિસ અને કામગીરીના શટડાઉનને કારણે લોકોમાં ગભરાટ વધ્યો છે. ઘણા પ્રોફેશનલ્સ જોબની બાબતમાં અનિશ્ચિત બન્યા છે.” આ પરિબળોને કારણે સરકારી જોબની માંગ વધી છે. ખાસ કરીને UPSC અને બેન્કની પરીક્ષા માટે સૌથી વધુ ધસારો છે.

બૈજુના ચીફ ઓપરેટિંગ ઓફિસર મ્રિણાલ મોહિતે જણાવ્યું હતું કે, “અમારા UPSC પ્રોગ્રામને લોકડાઉનના ગાળામાં જોરદાર પ્રતિસાદ મળ્યો છે. છેલ્લા 3-4 મહિનામાં આ પ્રોગ્રામ માટેની પૂછપરછ અને તેમાં રજિસ્ટર્ડ થનારા લોકોની સંખ્યા 60 ટકા વધી છે.” ઓફલાઇન કોચિંગમાં અગ્રણી કરિયર લોન્ચરના નેશનલ હેડ (ગવર્મેન્ટ એક્ઝામ પ્રોડક્ટ્સ) હિમાંશુ ત્યાગીના જણાવ્યા અનુસાર ઓનલાઇન UPSC ક્લાસની માંગમાં અઢી ગણો ઉછાળો નોંધાયો છે. કંપનીએ તાજેતરમાં બેન્કની પરીક્ષાઓ માટે પણ ઓનલાઇન કોર્સિસ લોન્ચ કર્યા છે.

ટેસ્ટબૂકના CEO આશુતોષ કુમારે જણાવ્યું હતું કે, “ગયા મહિને અમારા માસિક એન્રોલમેન્ટમાં બમણો વધારો થયો છે. વિદ્યાર્થીઓને એ વાતનો અહેસાસ છે કે, તેમણે લોકડાઉનના કારણે મળેલા વધારાના સમયનો ઉપયોગ પરીક્ષાની તૈયારી માટે કરવો જોઈએ. કોઈ પણ જાતના પ્રમોશન કે પબ્લિસિટી વગર અમારી બેન્કિંગ પરીક્ષાની ઘણી બેચ ભરાઈ ચૂકી છે.”

મહામારીને કારણે બેન્કિંગ પરીક્ષાની તારીખોમાં વિલંબ થયો છે. છતાં તેના કોચિંગ માટે ધસારો વધી રહ્યો છે. અન્ય એક લર્નિંગ અને એસેસમેન્ટ પ્લેટફોર્મ ઓલિવરબોર્ડે તાજેતરમાં ફ્રી મોક ટેસ્ટ્સ લોન્ચ કરી હતી. CEO અભિષેક પાટિલે જણાવ્યું હતું કે, “લોન્ચિંગ પછી રોજ 15,000-20,000 વિદ્યાર્થી ફ્રી લાઇવ ટેસ્ટ આપી રહ્યા છે.” ઉદ્યોગવર્તુળોના જણાવ્યા અનુસાર નાનાં ટાઉનના લોકો પણ હવે ઓનલાઇન ક્લાસ પર પસંદગી ઉતારી રહ્યા છે. અગાઉ તે ઘરની નજીકના અથવા મોટા શહેરમાં ચાલતા કોચિંગ ક્લાસમાં જવાનું પસંદ કરતા હતા.

ઇક્ઝામ્બીના CEO ચંદ્રપ્રકાશ જોશીના જણાવ્યા અનુસાર લગભગ 67 ટકા વિદ્યાર્થી બહુ નાના શહેરમાંથી આવે છે. જોશીના જણાવ્યા અનુસાર અગાઉના ક્વાર્ટરની તુલનામાં ફ્રી યુઝર્સમાંથી પેઇડ યુઝર્સમાં રૂપાંતરનો દર ત્રણ ગણો વધ્યો છે. ઉપરાંત, ઘણા પ્રોફેશનલ્સ હોમટાઉન પરત ફર્યા છે અને તે પણ સરકારી નોકરી માટે સક્રિય બન્યા છે