હાલમાં સોશિયલ મીડિયા પર શિવ તાંડવ સ્ત્રોતમનો એક વીડિયો ખૂબ વાયરલ થઈ રહ્યો છે. દેશ-દુનિયામાં લાખો લોકો તેને જોઈ, પસંદ કરીને શૅર કરી રહ્યા છે. પરંતુ શું તમે જાણો છો આ વીડિયો ક્યાંનો છે અને તેને સમર્પણ અને ભક્તિ-ભાવથી ગાનારા આ બાબા કોણ છે? આ વીડિયો મધ્ય પ્રદેશના પાટનગર ભોપાલની નજીક આવેલા વિશ્વ પ્રસિદ્ધ ભોજપુરના શિવ મંદિરમાં શૂટ કરવામાં આવ્યો છે. શિવ તાંડવ સ્ત્રોતમનો પાઠ કરનારા બાબા છે કાલીચરણ.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:
આ કોઈ અગાઉથી નક્કી કરીને તૈયાર કરવામાં આવેલો વીડિયો નથી. પરંતુ વિશાળ શિવલિંગ અને પુરાતત્વ ધરોહરને જોઈ બાબાના અંતર્મનમાંથી બહાર આવેલો ભાવ છે, જેને તેમની સાથે ગયેલા બજરંગ સેના મધ્ય પ્રદેશના અધ્યક્ષ અમરીશ રાયે પોતાના ફોનમાં શૂટ કરીને સોશિયલ મીડિયા પર મૂકી દીધો હતો. આ વીડિયોને લેખક આનંદ રંગનાથન અને અભિનેતા અનુપમ ખેરે પણ ખૂબ વખાણ્યો છે.
આ વીડિયોમાં શિવ તાંડવ સ્ત્રોતમનો પાઠ કરનારા કાલીચરણ બાબા મહારાષ્ટ્રના અકોલાના રહેવાસી છે. તેમનો ઈન્દોરના બાણગંગા વિસ્તારમાં પણ આશ્રમ છે. તેઓ બજરંગ સેનાના રાષ્ટ્રીય અનુશાસન પ્રભારી પણ છે. કાલીચરણ બાબા હાલમાં જ ભોજપુર શિવ મંદિર દર્શન કરવા ગયા હતા. તેઓએ ભાવપૂર્ણ રીતે અહીં જ્યારે શિવ તાંડવ સ્ત્રોતમનો પાઠ કર્યો તો સાથે આવેલા અમરીશ રાય સહિત બીજા અનેક લોકોએ વીડિયો શૂટ કરી દીધો. જ્યારે તે સોશિયલ મીડિયા પર વાયરલ થયો તો તેને ખૂબ પસંદ કરવામાં આવ્યો અને તે લાખો લોકો સુધી પહોંચી ગયો.
કાલીચરણ બાબાનું કહેવું છે કે ભોજપુરમાં ભગવાન શિવની દિવ્યતાનો અનુભવ અદ્ભૂત છે. અમારા વીડિયોને લાખો લોકો જોઈ રહ્યા છે. તમામ ધર્મ પ્રેમી લોકો અદ્ભૂત કોમેન્ટ કરી રહ્યા છે. તેઓ પોતાની ભક્તિ ભાવનાથી ભગવાન શિવ પ્રત્યે ભાવ પ્રગટ કરી રહ્યા છે. તેઓએ વધુમાં જણાવ્યું કે શિવની દિવ્ય ઝલક જોઈને હું મારો દેહભાવ ભૂલી ગયો અને આપમેળે શિવ તાંડવ સ્ત્રોતમનો પાઠ થવા લાગ્યો. મને કલ્પના નહોતી કે આ વીડિયો આટલો વાયરલ થશે. કાલીચરણ બાબાનું કહેવું છે કે તેની પાછળ ભગવાન શિવની ઈચ્છા જ જોવા મળી રહી છે.