ભારતને અન્ડર-19 વર્લ્ડ કપ જીતાડનારા ક્રિકેટર સામે પોલીસ ચાર્જશીટ દાખલ કરી

દિલ્હી: ભારતીય અન્ડર-19 ક્રિકેટ ટીમનો સભ્ય અને વર્લ્ડ કપ ફાઈનલમાં મેન ઑફ ધ મેચ બનેલો ક્રિકેટર મનજોત કાલરા ખોટી ઉંમર જણાવવાના આરોપમાં ફસાઈ ગયો છે. દિલ્હી પોલીસ તરફથી નોંધવામાં આવેલી ચાર્જશીટમાં જણાવાયું છે કે, મનજોતે પોતાની ઉંમર એક વર્ષ ઓછી જણાવી. દિલ્હી પોલીસની ક્રાઈમ બ્રાન્ચની ટીમ ક્રિકેટમાં અસલ ઉંમર સાથે ચેડા કરવાના ઘણા મામલાઓની તપાસ કરી રહી છે. ચાર્જશીટમાં કહેવામાં આવ્યું છે કે, કાલરાની અસલ જન્મ તારીખ 15 જાન્યુઆરી 1998 છે પણ તેણે 15 જાન્યુઆરી 1999 જણાવી છે. પોલીસે તીસ હજારી કોર્ટમાં ચીફ મેટ્રોપોલિટન મેજિસ્ટ્રેટ સામે આ ચાર્જશીટ દાખલ કરી છે. પોલીસે મનજોતની જગ્યાએ તેના પિતા પરવીન કુમાર અને રંજીત કૌરના નામ ચાર્જશીટમાં રાખ્યા છે. આ ઉપરાંત અન્ય 11 બાળકોના માતા-પિતાના નામ પણ તેમાં છે. હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો ચાર્જશીટમાં કહેવામાં આવ્યું છે કે, ‘એ સ્પષ્ટ છે કે, મનજોતની જન્મ તારીખ ને તેના માતા-પિતાએ દિલ્હી તરફથી રમાડવા માટે અયોગ્ય ફાયદા માટે બદલી. આ વાત પર કોઈ શંકા નથી કે, મનજોતના પરિવારજનોએ તેના બર્થ સર્ટિફિકેટમાં ફેરફાર કર્યા.’ જોકે, મનજોતના પિતાએ પોલીસના આરોપોનું ખંડન કર્યું છે. તેમણે કહ્યું, ‘જ્યારે તેને પહેલીવાર સ્કૂલમાં દાખલ કરવામાં આવ્યો ત્યારે તેની જન્મ તારીખ ખોટી લખાવી દીધી હતી. બાદમાં તેને બદલાવવામાં આવી હતી. તેની જન્મનું સાચું વર્ષ 1999 જ છે.’ કાલરાની સાથે-સાથે દિલ્હીના રણજી ક્રિકેટ નીતીશ રાણ પર પણ બર્થ ડેટમાં છેડછાડના આરોપ છે. પોલીસનું કહેવું છે કે, અંડર-15 ટીમમાં સ્થાન મેળવવા માટે તેના બર્થ સર્ટિફિકેટમાં ફેરફાર કરાયા હતા. આવું તેના પિતા દારા સિંહે કર્યું હતું. રાણા IPLમાં કોલકાતા નાઈટ રાઈડર્સ માટે રમે છે. જણાવી દઈએ કે, પૂર્વ ક્રિકેટર કીર્તિ આઝાદે ઉંમરમાં ગડબડ કરવાના ઘણા કેસોમાં 2014 અને 2015માં FIR નોંધાવી હતી. ભારતીય ટીમના પૂર્વ કેપ્ટન અને અંડર-19ના કોચ રાહુલ દ્રવિડે 2015માં ‘મેક પટૌડી’ વ્યાખ્યાનમાં ઉંમરમાં ચેડા કરવાના મુદ્દે ગંભીર નિવેદન આપ્યું હતું. તેણે આને ફિક્સિંગ અને ભ્રષ્ટાચાર ગણાવ્યો હતો. દ્રવિડે કહ્યું હતું કે, ‘મને લાગે છે કે, ઉંમર સાથે ચેડા કરવાનો વ્યાપાર ખતરનાક અને ઝેરીલો છે. આનાથી એક સવાલ પેદા થાય છે કે, જો એક બાળક પોતાના માતા-પિતા અને કોચને ગડબડ કરતા જુએ છે અને બનાવટી બર્થ સર્ટિફિકેટ બનાવતા જુએ છે તો શું તે આવા ચેડા કરતા નહીં શીખે? તે પોતાના વડીલો સામે જ જૂઠ્ઠુ બોલતા શીખશે. બની શકે છે કે, 14 વર્ષની ઉંમરે આ મુદ્દો માત્ર ઉંમરનો હોય પણ 25 વર્ષની ઉંમરે તે ફિક્સિંગ અથવા ભ્રષ્ટાચાર પણ થઈ શકે છે. બંનેમાં ફર્ક પણ શું છે?’