RCBની મોટી જીતથી રાતોરાત બદલાઈ ગયું IPLનું ગણિત

I am Gujarat

RCBની એક ‘વિરાટ’ જીતથી પલટાઈ ગઈ રમત

સોમવારે ઈન્દોરના હોલકર સ્ટેડિયમ ખાતે રમાયેલી IPL11ની 48મી મેચમાં રૉયલ ચેલેન્જ્રર્સ બેંગ્લોરે બાજી મારી. વિરાટ કોહલીની કેપ્ટનશિપમાં RCBએ કિંગ્સ ઈલેવન પંજાબને 10 વિકેટે હરાવી. બેંગ્લોરે સીઝનમાં સૌથી મોટી જીત મેળવી છે. આ કોઈપણ ટીમ દ્વારા IPL11માં સૌથી મોટી જીત છે.

IPL11ની સૌથી મોટી જીત

મેચમાં બેંગ્લોરના બોલરોએ પંજાબના બેટ્સમેનોને કોઈ રીતે ફાવટ આવવા દીધી નહીં અને પંજાબ માત્ર 88 રનમાં સમેટાઈ ગઈ. આ IPLની સીઝનમાં કોઈપણ ટીમ દ્વારા નોંધાવાયેલો બીજો સૌથી ઓછો સ્કોર છે. જીત માટે મળેલા 89 રનના ટાર્ગેટને બેંગ્લોરે વિરાટ અને પાર્થિવની શાનદાર ઈનિંગ્સના દમ પર મેળવી લીધો અને 10 વિકેટથી મેચ જીતી લીધી. બેંગ્લોરની આ જીત સાથે તેની પ્લેઑફની આશામાં વધારો થયો છે.

જાણો કેવા છે સમીકરણ

IPL11માં લીગ સ્ટેજ લગભગ પૂરો થવા આવ્યો છે. તમામ ટીમો પાસે હવે વધુમાં વધુ 3 મેચો બાકી રહી છે. બધી ટીમો પ્લેઑફમાં પહોંચવાની રેસમાં લાગેલી છે. લીગ રાઉન્ડના અંતે પોઈન્ટ ટેબલ્સમાં જે 4 ટીમો ટૉપ પર હશે તેમની વચ્ચે પ્લેઑફ રમાશે. અત્યારે જો ટીમોના પોઈન્ટ્સ પર નજર કરવામાં આવે તો સનરાઈઝર્સ હૈદરાબાદ અને ચેન્નઈ સુપરકિંગ્સ પ્લેઑફમાં પહોંચી ગઈ છે અને દિલ્હી ડેરડેવિલ્સ બહાર થઈ ચૂકી છે. બાકી રહેલી પાંચ ટીમો વચ્ચે પ્લેઑફ માટે ખરાખરીનો જંગ થશે. અત્યારે 48 મેચો બાદ પોઈન્ટ ટેબલની સ્થિતિ પ્રમાણે સનરાઈઝર્સ હૈદરાબાદ પ્રથમ, ચેન્નઈ સુપરકિંગ્સ બીજા, ત્રીજા ક્રમે કોલાકાતા નાઈટ રાઈડર્સ અને ચોથા સ્થાને રાજસ્થાન રૉયલ્સ છે.

હવે થશે અસલી જંગ

KKR અને રાજસ્થાન રૉયલ્સ અત્યારે ભલે ત્રીજા અને ચોથા ક્રમે હોય પણ તેમનું આ સ્થાન નક્કી નથી. બંનેના 12-12 પોઈન્ટ્સ છે અને પાંચમા ક્રમે રહેલી પંજાબ પાસે પણ આટલા જ પોઈન્ટ્સ છે. બીજી બાજુ મુંબઈ અને બેંગ્લોર 10-10 પોઈન્ટ્સ સાથે છઠ્ઠા અને સાતમા ક્રમે છે. હવે આ પાંચેય ટીમો પાસે બે-બે મેચો બાકી છે, અને જે ટીમ આ બંને મેચો સારા માર્જિનથી જીતી જશે તેને પ્લેઑફની ટિકિટ મળી જશે. જો કોઈ કારણોસર મેચ ટાઈ થાય અથવા પરિણામ ન નીકળી શકે તો રનરેટના આધારે નિર્ણય કરવામાં આવશે.