CACનો નિર્ણય બદલાયો, શાસ્ત્રીના 'માનીતા' અરુણ બોલિંગ કોચ

શાસ્ત્રીને મળ્યો મનપસંદ કોચિંગ સ્ટાફ મુંબઈઃ ભારતીય ક્રિકેટ ટીમના બોલિંગ કોચની પસંદગીના ચાલી રહેલા વિવાદ વચ્ચે મંગળવારે ભારતીય ક્રિકેટ કંટ્રોલ બોર્ડ (બીસીસીઆઈ)એ ભરત અરુણની બોલિંગ કોચ તરીકે નિમણૂક કરી છે, જ્યારે સંજય બાંગરને ટીમનો સહાયક કોચ બનાવ્યો છે. જ્યારે આર શ્રીધર ફીલ્ડિંગ કોચ હશે. આમ રવિ શાસ્ત્રીને તેની પસંદગીનો કોચિંગ સ્ટાફ મળ્યો છે. ભરત અરુણ 2019ના આઈસીસી વર્લ્ડ કપ એટલે કે બે વર્ષ સુધી ટીમ ઇન્ડિયાના કોચ રહેશે, જ્યારે વર્તમાન બેટિંગ કોચ સંજય બાંગર આટલા જ સમય સુધી ટીમમાં આસિસ્ટન્ટ કોચ તરીકે રહેશે. અરુણની બોલિંગ કોચ તરીકેની નિમણૂકની સાથે સંજય બાંગરને આસિ. કોચ તરીકે પ્રમોશન મળ્યું છે, જ્યારે શ્રીધરનો કોન્ટ્રેક્ટ લંબાવાયો છે. બીસીસીઆઈની બેઠકમાં નિર્ણય ભારતીય ક્રિકેટ ટીમના મુખ્ય કોચ બનેલા ભૂતપૂર્વ કેપ્ટન રવિ શાસ્ત્રી સુપ્રીમ કોર્ટ દ્વારા રચવામાં આવેલી એડમિનિસ્ટ્રેટર્સ કમિટી (COA)ને સંતુષ્ટ કરવામાં સફળ રહ્યા છે. મુંબઈમાં મંગળવારે બપોરે બે વાગ્યે બીસીસીઆઈની બેઠક યોજાઈ હતી, જેમાં બોલિંગ કોચ તરીકે ભરત અરુણ પર મહોર લગાવવામાં આવી હતી. આ સાથે જ રાહુલ દ્રવિડ અને ઝહીર ખાનની નિમણૂક અંગે સ્થિતિ સ્પષ્ટ થઈ ચૂકી છે. વાસ્તવમાં રવિ શાસ્ત્રી બોલિંગ કોચ માટે ભરત અરુણને ટીમમાં સામેલ કરવા માગતો હતો. બોલિંગ કોચ પર કેમ થયો હતો વિવાદ? બોલિંગ કોચ માટે ભારતીય ક્રિકેટનું એક જૂથ ઝહીર ખાનના નામ પર સંમત હતું, પરંતુ રવિ શાસ્ત્રી તેના નિકટના ભરત અરુણને બોલિંગ કોચ બનાવવા માગતા હતા. આ નિમણૂકને લીધે ભારતીય ક્રિકેટમાં મતભેદ ઊભા થયા હતા. કોણ છે ભરત અરુણ? 1979માં ભારતીય અન્ડર 19 ક્રિકેટ ટીમમાં જ્યારે રવિ શાસ્ત્રી કેપ્ટન હતા ત્યારે ટીમમાં બોલર તરીકે ભરત અરુણ રમતા હતા. અરુણ આ પહેલા 2014માં ટીમ ઇન્ડિયાના બોલિંગ કોચ રહી ચૂક્યા છે, એ સમયે પણ રવિ શાસ્ત્રી ટીમના ડિરેક્ટર હતા. એવું કહેવાતું હતું કે, એ વખતે બીસીસીઆઈ અધ્યક્ષ એન. શ્રીનિવાસને ભરત અરુણને ટીમના બોલિંગ કોચ બનાવ્યા હતા. અરુણની ક્રિકેટ કરિયર ભરત અરુણે 1986માં બોલર તરીકે ટેસ્ટ અને વનડે ટીમમાં ડેબ્યુ કર્યું હતું. ભારત માટે બે ટેસ્ટ મેચ રમીને ચાર વિકેટ અને ચાર વનડે રમીને માત્ર એક વિકેટ ઝડપી હતી. બંને ફોર્મેટમાં અરુણની કુલ પાંચ વિકેટ છે. 54 વર્ષના અરુણને વિદેશની ધરતી પર રમવાનો અનુભવ નથી.