સિડની ટેસ્ટમાં વધી ભારતની મુશ્કેલીઓ, પંત બાદ સ્ટાર ઓલરાઉન્ડર જાડેજા પણ ઈજાગ્રસ્ત

ભારતીય ક્રિકેટ ટીમ માટે સિડનીમાં રમાઈ રહેલી ત્રીજી મેચ ખરાબ સાબિત થઈ રહી છે. ત્રીજા દિવસે સમગ્ર ભારતીય ટીમ પહેલી ઈનિંગ્સમાં 244 રનમાં જ ઓલ આઉટ થઈ ગઈ. ત્યારે તેના બે મહત્વપૂર્ણ ખેલાડીઓ પણ ઈજાગ્રસ્ત થઈ ગયા. હાલમાં ટીમના સ્ટાર ઓલરાઉન્ડર રવિન્દ્ર જાડેજાને અંગુઠામાં ઈજાના કારણે ચાલુ મેચે હોસ્પિટલ જવું પડ્યું છે. બીસીસીઆઈએ આ મામલે ટ્વીટ કરીને કહ્યું કે, બેટિંગ કરતા સમયે જાડેજાના અંગુઠામાં ઈજા પહોંચી હતી, તેને સ્કેન માટે લઈ જવાયો છે.

હકીકતમાં જાડેજાને બેટિંગ દરમિયાન સ્ટાર્કનો બોલ અંગુઠા પર વાગ્યો હતો, જોકે તેમ છતાં તેણે બેટિંગ ચાલુ રાખી હતી. તે 37 બોલમાં 28 રન બનાવીને અણનમ રહ્યો હતો. પરંતુ ઈનિંગ્સ બાદ તેને અંગુઠામાં દુઃખાવો થતા ફિલ્ડીંગ માટે નહોતો આવ્યો. તેની જગ્યાએ મેદાન પર મયંક અગ્રવાલ સબ્સ્ટીટ્યૂટ ખેલાડી તરીકે મેદાનમાં ઉતર્યો હતો. ઉલ્લેખનીય છે કે જાડેજાએ પહેલી ઈનિંગ્સમાં શાનદાર બોલિંગ કરતા ઓસ્ટ્રેલિયાના ચાર ખેલાડીઓનો આઉટ કર્યા હતા. આ ઉપરાંત તેણે સ્મિથને પણ રનઆઉટ કરવામાં યોગદાન આપ્યું હતું.

ભારતની પ્રથમ ઈનિંગ્સ ખતમ થયા બાદ જાડેજાના અંગૂઠા પર સોજો આવી ગયો હતો. ફિઝિયોએ અંગુઠા પર ટેપ મારી આપી હતી, જે બાદ જાડેજાએ બોલિંગ કરવાનો પ્રયાસ કર્યો હતો, પરંતુ તેને વધારે દુઃખાવો થતા ત્યાંથી જ સીધા હોસ્પિટલમાં સ્કેનિંગ માટે લઈ જવાયો હતો.

બીજી તરફ જાડેજા પહેલાથી જ વિકેટકીપર રિષભ પંતને કોણીમાં ઈજા થવાના કારણે હોસ્પિટલ મોલવામાં આવ્યો હતો. જે બાદ રિદ્ધિમાન સારાને વિકેટકીપિંગની જવાબદારી સોંપવામાં આવી હતી. પંતને પણ બેટિંગ દરમિયાન કમિન્સનો બોલ કોણી પર વાગ્યો હતો.