પ્રેક્ટિસ સેશનમાં કેએલ રાહુલ ઘાયલ થતાં ટેસ્ટ સીરિઝમાંથી બહાર, ભારત પરત ફરશે

સિડનીઃ ઓસ્ટ્રેલિયાની મહેમાન બનેલી ભારતી ટીમને વધુ એક મુશ્કેલી પડી છે, આ વખતે મુશ્કેલી મેદાનની બહારની નહીં પરંતુ મેદાનની અંદરની છે. ટીમ ઈન્ડિયાનો ઓપનર કેએલ રાહુલ (KL Rahul) પ્રેક્ટિસ દરમિયાન ઘાયલ થયા ટીમમાંથી બહાર થયો છે. એટલે કે હવે આગામી બે ટેસ્ટ મેચ ભારતીય ટીમે કેએલ રાહુલ વગર જ રમવી પડશે.

મેલબર્નમાં ટીમ ઈન્ડિયાની નેટ પ્રેક્ટિસ દરમિયાન શનિવારે રાહુલના જમણા કાંડામાં ઈજા થઈ હતી. આ ઈજામાંથી બહાર આવતા રાહુલને લગભગ 3 અઠવાડિયા જેટલો સમય લાગશે તેમ માનવામાં આવી રહ્યું છે. ભારતીય ક્રિકેટ કંટ્રોલ બોર્ડ (BCCI) દ્વારા મંગળવારે આ અંગેની જાણકારી આપવામાં આવી છે.

BCCI દ્વારા આપવામાં આવેલી વિગત પ્રમાણે મેલબર્નમાં ટીમ ઈન્ડિયાના પ્રેક્ટિસ સેશન દરમિયાન રાહુલના કાંડામાં ઈજા થઈ હતી. આ ઈજા ગંભીર હોવાના કારણે તેમાંથી બહાર આવતા કેએલ રાહુલને 3 અઠવાડિયા માટે આરામ કરવો પડશે. એટલે કે હવે તે આગામી બે બાકી રહેલી ટેસ્ટ મેચમાં રમી શકશે નહીં.

રાહુલ ભારત પરત ફર્યા પછી બેંગ્લુરુ નેશનલ ક્રિકેટ એકેડમી આવશે અને અહીં તેનું રિહેબિલિટેશન શરુ કરવામાં આવશે. જોકે, રાહુલ ઓસ્ટ્રેલિયા સામેની હાલની ટેસ્ટ સીરિઝમાં એક પણ મેચ રમી શક્યો નથી.

ભારત ઓસ્ટ્રેલિયા વચ્ચે રમાઈ રહેલી 4 ટેસ્ટ બોર્ડર ગાવસ્કર ટ્રોફી (Border Gavaskar Trophy) મેચની સીરિઝમાં 1-1ની બરાબરી પર છે. આ સીરિઝની ત્રીજી મેચ 7 જાન્યુઆરીથી સિડનીમાં રમાવાની છે.