INDvAUS: મેલબોર્નમાં કાંગારૂ ટીમ 195 રને ઓલઆઉટ, બુમરાહની 4 અને અશ્વિનની 3 વિકેટ

મેલબોર્ન ક્રિકેટ ગ્રાઉન્ડ પર આજથી શરૂ થયેલી બોક્સિંગ ડે ટેસ્ટ મેચમાં ભારતીય બોલર્સે પહેલા દિવસ કમાલનું પ્રદર્શન કર્યું છે. વિરાટ કોહલીની ગેરહાજરીમાં અજિંક્ય રહાણેની આગેવાનીમાં રમવા ઉતરેલી ભારતીય ટીમે ઓસ્ટ્રેલિયાની ટીમને 72.3 ઓવરમાં 195 રનના સ્કોરે ઓલઆઉટ કરી દીધી છે. જેમાં જસપ્રીત બુમરાહ અને રવિચંદ્રન અશ્વિને શાનદાર બોલિંગ કરી હતી.

બોક્સિંગ ડે ટેસ્ટના પહેલા દિવસે ટોસ જીતીને પહેલા બેટિંગ કરવા ઉતરેલી ઓસ્ટ્રેલિયાની ટીમની શરૂઆત ખરાબ રહી હતી. ભારતીય બોલિંગ આક્રમણ સામે ઓપનર જો બર્ન્સ 0 રને આઉટ થયો હતો. આ બાદ મેથ્યુ વેડ 30 રન તથા સ્ટીવ સ્મિથ 0 રને આઉટ થયો હતો. ઓસી. ટીમ માટે માર્નસ લબુચાનેએ 132 બોલમાં 48 રનની તથા ટ્રેવિસ હેડે 92 બોલમાં 38 રનની મહત્વપૂર્ણ ઈનિંગ્સ રમી હતી.

ભારતીય બોલર્સની વાત કરીએ તો જસપ્રીત બુમરાહે મેચમાં તરખાટ મચાવતા 16 ઓવરમાં 56 રન આપીને 4 વિકેટ લીધી હતી. જ્યારે રવિચંદ્રન અશ્વિને 24 ઓવરમાં 35 રન આપીને 3 અને ડેબ્યૂ કરનારા મોહમ્મદ સિરાજે 15 ઓવરમાં 40 રન આપીને 2 વિકેટ લીધી હતી. જ્યારે રવિન્દ્ર જાડેજાએ 5.3 ઓવરમાં 15 રન આપીને 1 વિકેટ મેળવી હતી.

નોંધનીય છે કે આ મેચમાં ભારતીય ટીમ ચાર ફેરફાર સાથે ઉતરી છે. જેમાં કોહલી અને શમી ટીમમાં પહેલાથી નથી, એવામાં શુભમન ગિલ અને મોહમ્મદ સિરાજે ભારત માટે ટેસ્ટમાં ડેબ્યૂ કર્યું છે. જ્યારે રવિન્દ્ર જાડેજા અને રિષભ પંતને પણ ટીમમાં સ્થાન અપાયું છે. જ્યારે કે.એલ રાહુલને તક મળી શકી નથી.