પિતા બન્યો ક્રિકેટર ભુવનેશ્વર કુમાર, પત્નીએ આપ્યો દીકરીને જન્મ

ભારતીય ક્રિકેટર ભુનવેશ્વર કુમાર પિતા બન્યો છે. તેની પત્ની નુપૂર નાગરે એક દીકરીને જન્મ આપ્યો છે. ભારતીય ઝડપી બોલરે સોશિયલ મીડિયા પર પોસ્ટ કરીને આ વાતની જાણકારી આપી હતી.

ભુવનેશ્વર કુમારે ટ્વિટર પર પોસ્ટ કરી છે જેમાં તેણે લખ્યુ છે કે, આજે અમે અમારા જીવનની સૌથી મોટી ખુશીને આવકારીએ છીએ. 24-11-2021.
ભારતીય ક્રિકેટર્સે ભુવનેશ્વરને અભિનંદન પાઠવ્યા છે. સુરેશ રૈનાએ ટ્વિટર પર લખ્યું હતું કે, અભિનંદન ભાઈ. જ્યારે લિજેન્ડરી બેટ્સમેન સચિન તેંડુલકરે પણ તેને અભિનંદન પાઠવતા પોસ્ટ કરી હતી કે, તમને બંનેને ખૂબ ખૂબ અભિનંદન. પેરેન્ટહૂડની આ રોમાંચક જર્ની માટે મારી શુભેચ્છાઓ.

ભુવનેશ્વર કુમારે 23 નવેમ્બર 2017માં મેરઠમાં નુપૂર નાગર સાથે લગ્ન કર્યા હતા. તે અગાઉ આ કપલ સોશિયલ મીડિયા દ્વારા પોતાનો લવ એકબીજા પ્રત્યે વ્યક્ત કરતા રહેતા હતા ખાસ કરીને તેમના ઈન્સ્ટાગ્રામ એકાઉન્ટ પર વધારે એક્ટિવ રહેતા હતા.

આઈપીએલમાં સનરાઈઝર્સ હૈદરાબાદ માટે રમતો ભુવનેશ્વર કુમાર ટી20 વર્લ્ડ કપની ટીમનો ભાગ હતો. જોકે, ટી20 વર્લ્ડ કપમાં ભારતનું પ્રદર્શન નિરાશાજનક રહ્યું હતું અને તે સેમિફાઈનલમાં પણ પહોંચી શક્યું ન હતું.

ભારતીય ટીમ ટી20 વર્લ્ડ કપમાં પ્રથમ મેચમાં પાકિસ્તાન સામે હારી ગઈ હતી. ત્યારબાદ ન્યૂઝીલેન્ડ સામે પણ ટીમને પરાજયનો સામનો કરવો પડ્યો હતો. સુપર-12 સ્ટેજમાં ભારતીય ટીમ ત્રીજા ક્રમે રહી હતી. આ ગ્રુપમાંથી ન્યૂઝીલેન્ડ અને પાકિસ્તાન સેમિફાઈનલમાં પહોંચ્યા હતા. જેમાંથી ન્યૂઝીલેન્ડ ફાઈનલમાં પહોંચ્યું હતું. પરંતુ ફાઈનલમાં ઓસ્ટ્રેલિયા સામે તેને પરાજયનો સામનો કરવો પડ્યો હતો.