IND vs AUS: કેમરોન ગ્રીનની સામે ભારતીય બોલરોની હવા નીકળી, બનાવ્યો મોટો રેકોર્ડ

હૈદરાબાદ: ભારત અને ઓસ્ટ્રેલિયા (IND vs AUS) વચ્ચે શ્રેણીની નિર્ણાયક મેચ રમાઈ રહી છે. ત્રણ મેચની સિરીઝ હાલમાં 1-1થી બરાબર છે. રાજીવ ગાંધી ઈન્ટરનેશનલ ક્રિકેટ સ્ટેડિયમમાં રમાઈ રહેલી મેચમાં ભારતીય કેપ્ટન રોહિત શર્માએ ટોસ જીતીને બોલિંગ કરવાનો નિર્ણય કર્યો હતો. ઓસ્ટ્રેલિયા તરફથી પ્રથમ મેચનો હીરો કેમરોન ગ્રીને એરોન ફિન્ચ સાથે ધમાકેદાર ઈનિંગ્સની શરૂઆત કરી હતી.

ગ્રીને પહેલા બોલથી જ એટેક કર્યો
ઓસ્ટ્રેલિયાના ઓપનર કેમરોન ગ્રીને પહેલા બોલથી જ એટેક શરૂ કર્યો. તેણે બીજા જ બોલમાં ભુવનેશ્વર કુમાર સામે સિક્સર ફટકારી હતી. ત્રીજા બોલ પર તેણે ચોગ્ગો ફટકારીને ભારતીય ટીમ પર પ્રેશર વધાર્યું હતું. આ પછી પણ તેણે એટેક કરવાનું ચાલુ રાખ્યું. ગ્રીને જસપ્રિત બુમરાહ સામે ત્રીજી ઓવરમાં બેક ટુ બેક સિક્સર ફટકારી હતી.

19 બોલમાં મારી ફિફ્ટી
કેમરોન ગ્રીને ચોથી ઓવરમાં અક્ષર પટેલ સામે સતત ત્રણ બોલમાં ત્રણ ચોગ્ગા ફટકાર્યા હતા. 5મી ઓવરમાં તેણે 19 બોલમાં T20 ઈન્ટરનેશનલની બીજી ફિફ્ટી પૂરી કરી. ભારત સામેની T20 ઈન્ટરનેશનલ મેચમાં કોઈપણ બેટ્સમેન દ્વારા આ સૌથી ઝડપી ફિફ્ટી છે. 2016માં વેસ્ટ ઈન્ડિઝના જોન્સન ચાર્લ્સે 20 બોલમાં ફિફ્ટી ફટકારી હતી. આ સાથે જ ઓસ્ટ્રેલિયા માટે આ બીજી સૌથી ઝડપી અડધી સદી છે. ડેવિડ વોર્નર અને ગ્લેન મેક્સવેલે 18-18 બોલમાં ફિફ્ટી ફટકારેલી છે.

ભુવીએ લીધી વિકેટ21 બોલમાં 52 રન બનાવ્યા બાદ ગ્રીન 5મી ઓવરમાં જ ભુવનેશ્વર કુમારનો શિકાર બન્યો હતો. તેણે પોતાની ઇનિંગમાં 7 ફોર અને 3 સિક્સર ફટકારી હતી. જ્યારે તે પેવેલિયન પરત ફર્યો ત્યારે ઓસ્ટ્રેલિયાનો સ્કોર 62 રન હતો. આમાં અન્ય બેટ્સમેનોનું યોગદાન માત્ર 9 રન હતું. ભારતીય બોલરે એક રન વધારાનો આપ્યો હતો. અગાઉ શ્રેણીની પ્રથમ મેચમાં ગ્રીને ફિફ્ટી ફટકારી હતી. તેણે અત્યાર સુધીમાં ચાર T20 આંતરરાષ્ટ્રીય મેચ રમી છે અને તેમાં બે ફિફ્ટી ફટકારી છે.