પત્ની-પુત્ર સાથે વેકેશન માણી રહ્યો છે હાર્દિક પંડ્યા, ફરી રહ્યો છે ચાર્ટર્ડ ફ્લાઈટમાં

ભારતીય ક્રિકેટ ટીમ ન્યૂઝીલેન્ડ વિરુદ્ધ વર્લ્ડ ટેસ્ટ ચેમ્પિયનશિપની ફાઈનલ અને ત્યારબાદ ઈંગ્લેન્ડ વિરુદ્ધ ટેસ્ટ સિરીઝ રમવા માટે ઈંગ્લેન્ડના પ્રવાસે છે. જોકે, આ ટીમમાં ઓલ-રાઉન્ડર હાર્દિક પંડ્યાનો સમાવેશ કરવામાં આવ્યો નથી. હાર્દિક પંડ્યા આગામી મહિને શ્રીલંકા પ્રવાસે જનારી ભારતીય ટીમ સાથે જશે જેમાં ઘણા નવોદિત ખેલાડીઓને તક આપવામાં આવી છે.

જોકે, હાલમાં તે પોતાને મળેલા સમયનો ઉપયોગ પરિવાર માટે કરી રહ્યો છે. હાલમાં તે પત્ની નતાશા સ્ટેનકોવિક અને પુત્ર અગત્સ્ય તથા ભાઈ કૃણાલ પંડ્યા અને કેટલાક મિત્રો સાથે વેકેશન માણી રહ્યો છે. નતાશાએ રવિવારે હાર્દિક અને અગત્સ્યની એક તસ્વીર ઈન્સ્ટાગ્રામ પર પોસ્ટ કરી હતી. જોકે, તેઓ કઈ જગ્યાએ વેકેશન માણી રહ્યા છે તેનો ઉલ્લેખ કર્યો નથી. નતાશાએ પ્રાઈવેટ ચાર્ટર્ડ ફ્લાઈટ સાથે આ તસ્વીર પોસ્ટ કરી હતી.
અગાઉ હાર્દિક પંડ્યાએ પણ પોતાના સોશિયલ મીડિયા પેજ પર ચાર્ટર્ડ ફ્લાઈટમાં પોતાની કેટલીક તસ્વીરો પોસ્ટ કરી હતી. ફ્લાઈટમાંથી પોસ્ટ કરેલી એક તસ્વીરમાં તેણે લખ્યું હતું, ચિલિંગ ઈન ધ ક્લાઉડ્સ. જેમાં તેણે વ્હાઈટ કલરની પ્રિન્ટેડ ટી-શર્ટ પહેરી છે અને ડ્રિંકનો આનંદ માણી રહ્યો છે.
અન્ય એક તસ્વીરમાં હાર્દિક પત્ની નતાશા, ભાઈ કૃણાલ પંડ્યા અને અન્ય લોકો સાથે જોવા મળે છે. તેણે આ તસ્વીરની નીચે કેપ્શનમાં લખ્યું હતું કે, માય ટ્રાવેલ કમ્પેનિયન (મારા પ્રવાસના સાથીઓ).
નોંધનીય છે કે હાર્દિક પંડ્યા અને તેનો ભાઈ કૃણાલ આગામી મહિને શ્રીલંકા પ્રવાસથી સ્પર્ધાત્મક ક્રિકેટમાં પાછા ફરી રહ્યા છે. શ્રીલંકા પ્રવાસમાં ભારતની બીજા દરજ્જાની ટીમ રમશે. જેમાં નવા ખેલાડીઓનો પણ સમાવેશ કરવામાં આવ્યો છે. શ્રીલંકામાં ભારત ત્રણ વન-ડે અને ત્રણ ટી20 મેચની સિરીઝ રમશે. ભારતના શ્રીલંકા પ્રવાસની શરૂઆત 13 જૂલાઈથી થશે.

શ્રીલંકા પ્રવાસ માટે અનુભવી ઓપનર શિખર ધવનને ટીમનો સુકાની બનાવવામાં આવ્યો છે. જ્યારે ઝડપી બોલર ભુવનેશ્વર કુમાર ઉપસુકાની રહેશે. ભૂતપૂર્વ ભારતીય સુકાની અને એનસીએ ડાયરેક્ટર રાહુલ દ્રવિડને ટીમનો મેનેજર બનાવવામાં આવ્યો છે.