રોહિત પ્રથમ વખત બન્યો ટેસ્ટ ટીમનો ઉપસુકાની, ચેતેશ્વર પૂજારાનું સ્થાન લેશે

નવી દિલ્હીઃ ઈજામુક્ત થયા બાદ ક્વોરેન્ટીન સમય પૂરો કરીને સ્ટાર ઓપનર રોહિત શર્મા ભારતીય ક્રિકેટ ટીમ સાથે જોડાઈ ગયો છે. રોહિત શર્માને શુક્રવારે ટીમનો ઉપસુકાની બનાવવામાં આવ્યો હતો. રોહિતને તેની કારકિર્દીમાં પ્રથમ વખત ટેસ્ટ ટીમો ઉપસુકાની બનાવવામાં આવ્યો છે. રોહિત શર્મા ટેસ્ટ નિષ્ણાંત ચેતેશ્વર પૂજારાનું સ્થાન લેશે. પૂજારાએ મેલબોર્નમાં રમાયેલી બીજી ટેસ્ટમાં ટીમના ઉપસુકાની પદની જવાબદારી સંભાળી હતી.

નિયમિત સુકાની વિરાટ કોહલી એડિલેડમાં રમાયેલી પ્રથમ ટેસ્ટ બાદ પેટરનિટી લીવ પર ભારત પરત ફર્યો છે. બીજી ટેસ્ટ માટે ચેતેશ્વર પૂજારાને ઉપસુકાની બનાવવામાં આવ્યો હતો. જોકે, કહેવામાં આવી રહ્યું છે કે ટીમ મેનેજમેન્ટે પહેલાથી જ સ્પષ્ટ કરી દીધું હતું કે રોહિત શર્મા ફિટ થઈ જશે અને ટીમમાં સામેલ થશે તો તેને ઉપસુકાની બનાવવામાં આવશે.

એક સિનિયર અધિકારીએ નામ જાહેર ન કરવાની શરતે જણાવ્યું હતું કે, જો વિરાટ કોહલી બ્રેક પર હોય અને અજિંક્ય રહાણે કેપ્ટન હોય ત્યારે ઉપસુકાની કોણ હશે તેને લઈને ક્યારેય શંકા રહી નથી. રોહિત શર્મા અને ચેતેશ્વર પૂજારા આ પદ માટે નક્કી જ હતા. રોહિત ઘણા સમયથી ભારતીય વન-ડે અને ટી20 ટીમનો સુકાની છે.

નોંધનીય છે કે રોહિત શર્માએ સિડનીના એક એપાર્ટમેન્ટમાં 14 દિવસનો ક્વોરેન્ટીન સમય પૂરો કર્યો હતો અને બુધવારે મેલબોર્નમાં ભારતીય ટીમ સાથે જોડાયો હતો. જોકે, હજી સુધી નક્કી નથી કે રોહિત શર્મા શુભમન ગિલ સાથે ઓપનિંગમાં આવશે કે નહીં. ઓપનર મયંક અગ્રવાલ પ્રથમ બે ટેસ્ટમાં નિષ્ફળ રહ્યો હતો તેથી આગામી ટેસ્ટમાં તેના રમવા સામે પ્રશ્નાર્થ છે. તેથી રોહિત ઓપનિંગમાં આવશે કે પછી હનુમા વિહારીના બદલે મિડલ ઓર્ડરમાં બેટિંગ કરશે.

રોહિત શર્માએ ગુરૂવારથી ટ્રેનિંગ શરૂ કરી દીધી છે. રોહિતે અત્યાર સુધી 32 ટેસ્ટ રમી છે જેમાં તેણે 46થી વધુની સરેરાશ સાથે 2141 રન નોંધાવ્યા છે. તેણે છ સદી ફટકારી છે જેમાં 2019મા સાઉથ આફ્રિકા વિરુદ્ધ 212 રનની ઈનિંગ્સ તેનો સર્વોચ્ચ સ્કોર છે. ભારતીય ટીમ મેલબોર્નમાં છે અને તે પાંચ જાન્યુઆરીએ ત્રીજી ટેસ્ટ રમવા માટે સિડની જશે. ભારત અને ઓસ્ટ્રેલિયા વચ્ચે 7 જાન્યુઆરીથી બીજી ટેસ્ટ શરૂ થશે.