ઓસ્ટ્રેલિયામાં શુભમન ગિલની સફળતા પાછળ છે ભારતના આ ભૂતપૂર્વ સ્ટારનો હાથ

ચંદીગઢઃ મેલબોર્નમાં પોતાની ડેબ્યુ મેચમાં જ નાથન લાયન વિરુદ્ધ આગળ આવીને શોટ ફટકારવાનો હોય કે પછી ગાબામાં મિચેલ સ્ટાર્કની ધોલાઈ કરવાની હોય શુભમન ગિલની બેટિંગ સ્ટાઈલથી તમામ લોકો પ્રભાવિત થયા છે. બોર્ડર-ગાવસ્કર ટ્રોફી સિરીઝમાં છ ઈનિંગ્સમાં ગિલ ક્યારેય ગભરાયેલો હોય તેવું જોવા મળ્યું નથી. ઓસ્ટ્રેલિયામાં યજમાન ટીમ સામે કારકિર્દીની શરૂઆત કરી હોવા છતાં તેણે આત્મવિશ્વાસ સાથે બેટિંગ કરી હતી. તેમાં પણ ગાબામાં મેચના પાંચમાં અને અંતિમ દિવસે ચોથા દાવમાં 91 રનની યાદગાર ઈનિંગ્સ રમીને ભારતને ઐતિહાસક વિજય અપાવવામાં મહત્વની ભૂમિકા ભજવી હતી. મેચ સાથે ભારતે 2-1થી સિરીઝ પણ જીતી હતી.

શુભમન ગિલે જણાવ્યું હતું કે, હવે હું ઘણી જ રાહત અનુભવી રહ્યો છું. ભારત માટે ડેબ્યુ કરવું મારા માટે મોટી રાહતની વાત છે. હું શરૂઆતમાં થોડો નવર્સ હતો પરંતુ પ્રત્યેક ઈનિંગ્સ સાથે મારો આત્મવિશ્વાસ વધતો રહ્યો હતો.

જોકે, ગિલને તેના પિતા લખવિન્દર ગિલની જેમ ઓસ્ટ્રેલિયામાં સદી ન ફટકારવાનો વસવસો રહ્યો છે. 21 વર્ષીય ઓપનરે જણાવ્યું હતું કે, જો સદી ફટકારી હોત તો મારા માટે સોનામાં સુગંધ ભળી હોય તેવું રહ્યું હોત, પરંતુ ટીમના વિજયમાં મેં જે યોગદાન આપ્યું હતું તેનાથી હું ખુશ છું. મને આ પ્રવાસમાંથી ઘણું શીખવા મળ્યું છે અને તેનાથી મને વધારે સારો ક્રિકેટર બનવામાં મદદ મળશે.

મારો આગામી લક્ષ્યાંક આ સ્તરે સતત શ્રેષ્ઠ પ્રદર્શન કરતા રહેવાનો છે. ઈંગ્લેન્ડની સિરીઝ મારા માટે ઘણી મહત્વની છે કારણ કે હવે લોકોને મારા પ્રત્યેથી અપેક્ષા વધી છે. જેમ્સ એન્ડરસન, સ્ટુઅર્ટ બ્રોડ અને જોફ્રા આર્ચર જેવા બોલર્સનો સામનો કરવો મારા માટે પડકારજનક રહેશે પરંતુ હું તેના માટે તૈયાર છું, તેમ તેણે જણાવ્યું હતું.

ઓસ્ટ્રેલિયામાં પોતાની સફળતા માટે ગિલે ભારતના ભૂતપૂર્વ સ્ટાર ઓલ-રાઉન્ડર યુવરાજ સિંહને શ્રેય આપ્યો હતો. ગિલે જણાવ્યું હતું કે, આઈપીએલ અગાઉ યુવી પાજી સાથે કેમ્પથી મને ઘણો ફાયદો થયો હતો. તે કેમ્પ દરમિયાન તેમણે મને ઓસ્ટ્રેલિયામાં બાઉન્સર્સનો સામનો કરવા માટે તૈયાર કર્યો હતો. તેમણે મારા વિરુદ્ધ વિવિધ રીતે ઘણા બાઉન્સર્સ ફેંક્યા હતા અને મને તેનો સામનો કરતા શીખવાડ્યું હતું. મને લાગે છે તેનાથી મને ઘણો ફાયદો થયો છે.