અંતિમ વન-ડે અગાઉ ભારતને રાહત, ઓસ્ટ્રેલિયાને મોટો ફટકો

સિડનીઃ પ્રથમ બે વન-ડે હારવાની સાથે ત્રણ મેચની સિરીઝ ગુમાવનારી ભારતીય ક્રિકેટ ટીમને બુધવારે રમાનારી ત્રીજી અને અંતિમ વન-ડે અગાઉ રાહત મળી છે. પ્રથમ બે મેચમાં શાનદાર બેટિંગ કરનારો ઓપનર ડેવિડ વોર્નર ઈજાના કારણે અંતિમ મેચમાં રમી શકશે નહીં. આ ઉપરાંત ઈનફોર્મ ઝડપી બોલર પેટ કમિન્સને પણ આરામ આપવામાં આવ્યો છે.

પ્રથમ બે વન-ડેમાં વોર્નરે અનુક્રમે 69 અને 83 રનની ઈનિંગ્સ રમી હતી. જોકે, સિડની ખાતે રમાયેલી બીજી વન-ડેમાં ફિલ્ડિંગ દરમિયાન વોર્નરને ઈજા થઈ હતી. આ મેચમાં ભારતનો 51 રને પરાજય થયો હતો અને ઓસ્ટ્રેલિયાએ શ્રેણીમાં 2-0ની અજેય સરસાઈ મેળવી લીધી હતી. વોર્નર હવે રિહેબિલિટેશનમાં રહેશે અને 17 ડિસેમ્બરે એડિલેડમાં રમાનારી પ્રથમ ટેસ્ટ અગાઉ ફિટ થવાનો પ્રયાસ કરશે.
ઓસ્ટ્રેલિયન મીડિયાએ કોચ જસ્ટિન લેંગરના ક્વોટને ટાંક્યો હતો કે, પેટ કમિન્સ અને ડેવિડ વોર્નર ટેસ્ટ સિરીઝમાં અમારી રણનીતિનો મહત્વનો ભાગ છે. વોર્નર રિહાબમાં પોતાની ઈજા પર કામ કરશે અને ખેલાડીઓના કામના ભારણને ઓછુ કરવાના ભાગ રૂપે પેટ કમિન્સને આરામ આપવામાં આવ્યો છે. ઘરઆંગણે રમાનારી મહત્વની સિરીઝ માટે બંને શારીરિક અને માનસિક રીતે ફિટ રહે તે અમારી સૌથી મોટી પ્રાથમિકતા છે.
વોર્નરના સ્થાને બિગ બેશ લીગમાં સૌથી વધુ રન નોંધાવનારા ડાબોડી બેટ્સમેન ડી'આર્કી શોર્ટને ટીમમાં સામેલ કરવામાં આવ્યો છે. નોંધનીય છે કે ભારત અને ઓસ્ટ્રેલિયા વચ્ચે બુધવારે અંતિમ વન-ડે રમાશે અને ત્યારબાદ 4 ડિસેમ્બરથી બંને ટીમો વચ્ચે ત્રણ મેચની ટી20 સિરીઝનો પ્રારંભ થશે. ત્યારપછી બંને ટીમ ટેસ્ટ સિરીઝમાં આમને સામને થશે જ્યાં તેઓ ચાર મેચની સિરીઝ રમશે.