ઈંગ્લેન્ડ સામે બીજી ટેસ્ટમાં રેકોર્ડ નોંધાવનારા અશ્વિને માંગી હરભજન સિંહની માફી

ઈંગ્લેન્ડ સામે ચેન્નઈમાં રમાઈ રહેલી બીજી ટેસ્ટ ક્રિકેટ મેચમાં ભારતીય ઓફ સ્પિનર રવિચંદ્રન અશ્વિને હરભજન સિંહના એક રેકોર્ડને તોડી નાંખ્યો હતો. બાદમાં અશ્વિને ભારતના દિગ્ગજ સ્પિનરની માફી માંગી હતી. અશ્વિને ભારતીય ધરતી પર રમાયેલી ટેસ્ટ મેચોમાં સૌથી વધુ વિકેટ લેવાના હરભજનના રેકોર્ડને તોડી નાંખ્યો હતો.

અશ્વિને ઘરઆંગણે રમાયેલી ટેસ્ટ મેચોમાં કુલ 266 વિકેટો ઝડપી છે અને હવે તે લિજેન્ડરી સ્પિનર અનીલ કુંબલે બાદ બીજા ક્રમે આવી ગયો છે. કુંબલેએ ઘરઆંગણે ટેસ્ટમાં 350 વિકેટ ઝડપી છે. અશ્વિને ઈંગ્લેન્ડના પ્રથમ દાવમાં બેન સ્ટોક્સને આઉટ કરીને હરભજન સિંહના 265 વિકેટના રેકોર્ડને પાછળ રાખી દીધો હતો.

રવિવારે બીજા દિવસની રમત પૂરી થયા બાદ વર્ચ્યુઅલ પ્રેસ કોન્ફરન્સમાં અશ્વિને કહ્યું હતું કે, 2001મા જ્યારે મેં ભજ્જુ પા (હરભજન સિંહ)ને રમતા જોયા હતા ત્યારે મેં કલ્પના પણ ન હતી કરી કે હું ટીમ ઈન્ડિયાનો ઓફ સ્પિનર બનીશ. ત્યારે હું મારા રાજ્યની ટીમનો બેટ્સમેન હતો અને બેટ્સમેન તરીકે કારકિર્દી બનાવવા માટે આગળ ધપી રહ્યો હતો. મને ખબર પણ ન હતી કે હું દેશ માટે રમીશ કે નહીં.

34 વર્ષીય અશ્વિને 76 ટેસ્ટમાં 391 વિકેટ ઝડપી છે. અશ્વિને જણાવ્યું હતું કે જ્યારે તે યુવાન ખેલાડી હતો ત્યારે હું હરભજનની જેમ બોલિંગ કરવાનો પ્રયાસ કરતો હતો ત્યારે ઘણા ટીમ ખેલાડીઓ તેની મજાક ઉડાવતા હતા. તેણે કહ્યું હતું કે, તે સમયે લોકો મારી મજાક ઉડાવતા હતા કેમ કે હું ભજ્જુ પા જેવી બોલિંગ કરતો હતો, મારી એક્શન અને બોલિંગ સ્ટાઈલ પણ તે જ પ્રકારની બને તેવો પ્રયાસ કરતો હતો. ત્યારથી શરૂ કરીને અત્યારે તેમનો રેકોર્ડ તોડવા સુધીની પ્રક્રિયા ઘણી જ અદ્દભુત રહી છે. હું આ રેકોર્ડ વિશે જાણતો ન હતો પરંતુ અત્યારે મને તેનો ખ્યાલ આવ્યો છે અને હું ખુશ છું. સોરી ભજ્જુ પા.

અશ્વિને 43 રનમાં પાંચ વિકેટ ઝડપી હતી અને તેના કારણે ઈંગ્લેન્ડનો પ્રથમ દાવ 134 રનમાં સમેટાઈ ગયો હતો. ભારત માટે કુંબલેએ સૌથી વધુ 619 ટેસ્ટ વિકેટ ઝડપી છે. જ્યારે કપિલ દેવ 434 વિકેટ સાથે આ યાદીમાં બીજા ક્રમે છે. જોકે, કપિલ દેવ ઝડપી બોલર હતો. તેથી સ્પિનર્સમાં કુંબલે બાદ હરભજન સિંહ 417 વિકેટ સાથે બીજા ક્રમે છે અને હવે અશ્વિન 400 વિકેટ મેળવવાથી થોડી જ વિકેટ દૂર છે.