બેટિંગમાં જતા પહેલા ઈશાન કિશને સાથી ખેલાડીઓને કહી હતી એક ખાસ વાત

ભારતીય વિકેટકીપર બેટ્સમેન ઈશાન કિશને તેની વન-ડે કારકિર્દીનો ધમાકેદાર પ્રારંભ કર્યો છે. રવિવારે શ્રીલંકા વિરુદ્ધ રમાયેલી પ્રથમ વન-ડે ક્રિકેટ મેચમાં તેણે 42 બોલમાં 59 રનની તાબડતોબ ઈનિંગ્સ રમી હતી. જેની મદદથી ભારતે શ્રીલંકાએ આપેલા 263 રનના લક્ષ્યાંકને આસાનીથી પાર પાડ્યો હતો. કિશન શરૂઆતથી જ નક્કી કરીને આવ્યો હતો કે તે પ્રથમ બોલ પર જ સિક્સર ફટકારશે.

મેચ બાદ યુઝવેન્દ્ર ચહલની 'ચહલ ટીવી' સાથેની વાતચીતમાં 23 વર્ષીય કિશને જણાવ્યું હતું કે મેદાનમાં બેટિંગ માટે જતા પહેલા તેણે સાથી ખેલાડીઓને કહ્યું હતું કે તે પહેલા બોલ પર સિક્સર ફટકારશે. ભલે બોલર ગમે ત્યાં બોલ કરશે પરંતુ તે સિક્સર ફટકારશે.

મેં વિચાર્યું હતું કે નસીબ મારી સાથે છે. આજે મારો જન્મ દિવસ હતો અને મેં 50 ઓવર વિકેટકીપિંગ કરી હતી. હું જાણતો હતો કે સ્પિનર્સને વધારે મદદ મળી ન હતી. તેથી મને ખ્યાલ હતો કે પ્રથમ બોલ પર સિક્સર ફટકારવાની આ શ્રેષ્ઠ તક છે. મેં સાથી ખેલાડીઓને કહ્યું હતું કે ગમે તે પ્રથમ બોલ કરશે અને ગમે ત્યાં કરશે પરંતુ હું પ્રથમ બોલ પર સિક્સર ફટકારીશ, તેમ કિશને જણાવ્યું હતું.

ઈશાન કિશન માટે આંતરરાષ્ટ્રીય ક્રિકેટ પદાર્પણ ઘણું જ શાનદાર રહ્યું છે. તેણે પોતાની પ્રથમ આંતરરાષ્ટ્રીય ટી20 મેચમાં પણ અડધી સદી ફટકારી હતી. શ્રીલંકા સામે વન-ડેમાં તેણે શાનદાર બેટિંગ કરી હતી અને બાદમાં સુકાની શિખર ધવને અણનમ 86 રન નોંધાવ્યા હતા જેની મદદથી ભારતે 36.4 ઓવરમાં જ ત્રણ વિકેટે 263 રન નોંધાવીને મેચ આસાનીથી જીતી લીધી હતી.