મુંબઈ- એક વર્ષ પહેલા ક્રિકેટર ચેતન સાકરિયાનું નામ ઘણાં ઓછા લોકો જાણતા હશે. પરંતુ ગુજરાતથી આવતો આ યુવા ખેલાડી પોતાની પ્રતિભાને કારણે હવે નામના મેળવી રહ્યો છે. IPL 2021માં રાજસ્થાન રોયલ્સની ટીમે તેમને 1.2 કરોડ રુપિયામાં ખરીદ્યો હતો. સોમવારના રોજ પંજાબ કિંગ્સ સામે રમાયેલી મેચમાં તેને ડેબ્યુની તક મળી અને તે પ્રથમ મેચમાં જ છવાઈ ગયો. પ્રથમ મેચમાં જ તેણે ત્રણ વિકેટો ઝડપી અને એક કેચ પણ પકડ્યો.
ચેતન સાકરિયાઓનો અહીં સુધી પહોંચવાનો રસ્તો સરળ નહોતો. એક સમયે તેમની પાસે સ્પાઈક્સ ખરીદવાના પૈસા પણ નહોતા. તેમના પિતા ટેમ્પો ચલાવતા હતા અને બે સમયના ભોજનની વ્યવસ્થા પણ માંડ માંડ થતી હતી. ચેતન નહોતો ઈચ્છતો કે તેના પિતા કામ કરે. એક ઈન્ટર્વ્યુમાં ચેતને જણાવ્યુ હતું કે, બે વર્ષ પહેલા તેના પિતાએ ટેમ્પો છોડવો પડ્યો હતો.
આ જ વર્ષે ચેતને પોતાનો એક ભાઈ ગુમાવ્યો છે. તેના ભાઈએ આત્મહત્યા કરી હતી. તે સમયે ચેતન સૈયદ મુશ્તાક અલી ટ્રોફીમાં રમી રહ્યા હતા. ચેતનના માતાએ એક ઈન્ટર્વ્યુમાં કહ્યું કે લગભગ 10 દિવસ સુધી અમે તેને જણાવ્યુ નહોતુ, જેથી તેની રમત પ્રભાવિત ના થાય. તે દરમિયાન ચેતન જ્યારે પણ કૉલ કરતો, પોતાના પિતાના સ્વાસ્થ્ય વિષે પૂછતો અને ભાઈ સાથે વાત કરવાનું કહેતો.
ચેતન સાકરિયાનો સંઘર્ષ આખરે રંગ લાવી રહ્યો હોય તેમ જણાઈ રહ્યું છે. સોમવારે ડેબ્યુ મેચમાં તેમણે જબરદસ્ત બોલિંગ કરી. એવી મેચ જ્યાં વિરોધી ટીમે 221 રન બનાવ્યા હોય ત્યારે ચેતન સાકરિયાની ઈકોનોમી 7.75 રહી હતી, જે ઘણી સારી વાત છે. તેમણે પહેલી ઓવરમાં 10 રન આપ્યા અને પછી મયંગ અગ્રવાલની વિકેટ લીધી અને પછી માત્ર એક રન આપ્યો.