ક્રિકેટના 143 વર્ષના ઈતિહાસમાં પહેલીવાર, ટીમમાં નહોતો તે ખેલાડી બન્યો 'મેન ઓફ ધ મેચ'

ક્રિકેટના ઈતિહાસમાં ઘણા ચોંકાવનારા રેકોર્ડ્સ અને ઘટનાઓ થયેલી છે. આવી જ એક અનોખી ઘટના ઓસ્ટ્રેલિયા સામે રમાયેલી ભારતની પહેલી ટી-20 ઈન્ટરનેશનલ મેચમાં જોવા મળી હતી. મેચમાં કેપ્ટન વિરાટ કોહલીના ખાસ મનાતા યજુર્વેન્દ્ર ચહલને પ્લેઈંગ ઈલેવનમાં સ્થાન નહોતું મળ્યું. જોકે મેચની બીજી ઈનિંગ્સમાં આવેલા ચહલે શાનદાર બોલિંગ કરી અને 'મેન ઓફ ધ મેચ'નો ખિતાબ પણ જીતી લીધો. ચહલના બોલિંગનો ખૌફ તો આ વાતથી સાબિત થાય છે કે વિરોધી ટીમના કોચ પણ તેના બોલિંગ કરવાથી નારાજ થઈ ગયા હતા.

જોકે આ મેચમાં ચહલે એક ખાસ રેકોર્ડ પોતાના નામે કરી લીધો છે જે ક્રિકેટના 143 વર્ષના ઈતિહાસમાં પહેલા ક્યારેય નથી નોંધાયો. ચહલ ક્રિકેટના ઈતિહાસનો પહેલો એવો ક્રિકેટર બની ગયો છે, જે પ્લેઈિંગ ઈલેવનમાં ન હોવા છતાં મેચમાં 'મેન ઓફ ધ મેચ'નો એવોર્ડ જીત્યો છે.

ક્રિકેટના ઈતિહાસની પહેલી ઓફિશિયલ મેચ 15થી 19 માર્ચ 1877માં રમાઈ હતી અને તે ઈંગ્લેન્ડ તથા ઓસ્ટ્રેલિયા વચ્ચે મેલબોર્ન મેદાન પર થઈ હતી. આ દ્રષ્ટિએ જોઈએ તો 143 વર્ષના ઈતિહાસમાં ચહલ પહેલો એવો ખેલાડી છે જે પ્લેઈંગ ઈલેવનમાં ન હોવા છતાં પણ મેન ઓફ ધ મેચ બની ગયો.

જાડેજાને ઈજા પહોંચી અને ઓસ્ટ્રેલિયાને પેટમાં દુઃખ્યું
કોઈ ટીમનો મુખ્ય ખેલાડી ચાલુ મેચમાં ઈજાગ્રસ્ત થઈ જાય છે ટીમ ઉદાસ અને વિપક્ષી ટીમ રાહતનો શ્વાસ લેતી હોય છે. પરંતુ અહીં તો ભારત માટે સૌથી મહત્વપૂર્ણ ખેલાડી મનાતા રવિન્દ્ર જાડેજાના ઈજાગ્રસ્ત થયા બાદ ચહલ બોલિંગ કરવા આવતા ઓસ્ટ્રેલિયાની ટીમ ઉદાસ જોવા મળી હતી. ટીમના કોચ જસ્ટીન લેંગરે તો રેફરીને પણ ફરિયાદ કરવાનો પ્રયાસ કર્યો, પણ કંઈ થઈ શક્યું નહીં. ચહલે મેચમાં 3 મહત્વપૂર્ણ વિકેટ લીધી અને ટીમને જીતાડવામાં મહત્વપૂર્ણ ફાળો આપ્યો હતો.