સ્ટમ્પની પાછળ રિષભ પંત 'કવિ' બન્યો, કેમેરામાં કેદ થઈ નવી 'કવિતા'

ભારત અને ઈંગ્લેન્ડ વચ્ચે ટેસ્ટ સીરિઝ શરૂ થઈ ગઈ છે. ચાર મેચોની સીરિઝની પહેલી ટેસ્ટ ચેન્નઈમાં શુક્રવારે શરૂ થઈ હતી. ઈંગ્લેન્ડના કેપ્ટન જો રૂટે ટોસ જીતીને બેટિંગનો નિર્ણય લીધો અને પોતાની ટીમને મજબૂત સ્થિતિમાં લાવી દીધી. ઈંગ્લેન્ડે રૂટની સદીની મદદથી પહેલા દિવસે 3 વિકેટના નુકસાન પર 263 રન બનાવ્યા હતા.

મેચનો પહેલો દિવસ ભારત માટે વધારે ખાસ નહોતો રહ્યો, પરંતુ વિકેટકીપર રિષભ પંતે બોલર્સ અને ટીમના મનોબળને ટકાવી રાખવા માટે સ્ટમ્પની પાછળથી સતત મનોરંજન કરતો રહ્યો. ભારતે પહેલા સત્રના અંત સુધીમાં રોરી બર્ન્સ અને ડેનિયલ લોરેન્સની વિકેટ લીધી, પરંતુ પછી જો રૂટ અને ડોમ સિબ્લીએ સારી બેટિંગ કરી અને પાર્ટનરશીપ 100 રનથી આગળ પહોંચાડી.

આ દરમિયાન મેચમાં રિષભ પંતનો મસ્તી ભર્યો અંદાજ ફરી એકવાર સામે આવ્યો. ઈનિંગ્સની 70મી ઓવરમાં વોશિંગ્ટન સુંદર બોલિંગ કરી રહ્યો હતો. આ સમયે સ્ટમ્પની પાછળથી પંતનો અવાજ આવ્યો. તે કહી રહ્યો હતો કે, મારું નામ વોશિંગ્ટન છે, મારે જવું છે ડીસી. ઓસ્ટ્રેલિયામાં સ્પાઈડરમેન-સ્પાઈડરમેન બાદ હવે પંતનો નવો વીડિયો વાઈરલ થઈ રહ્યો છે.

ભારત અને ઈંગ્લેન્ડની ટેસ્ટનો પહેલો દિવસ જો રૂટના નામે રહ્યો હતો. તેણે સદી ફટકારી હતી. જ્યારે ડોમિનિક સિબ્લીએ પણ શાનદાર બેટિંગ કરી હતી. ચેપોકની પિચ પર રમતના બીજા ભાગમાં વધારે ટર્ન જોવા મળતો હોય છે. એવામાં જો મહેમાન ટીમ 500ની આસપાસ સ્કોર બનાી દે છે તો આ ભારત માટે મુશ્કેલ થશે.