રિષભ પંતે ગીત ગાઈને બોલરને સમજાવ્યું કેવી રીતે બોલિંગ કરવી, સ્ટમ્પ માઈકમાં રેકોર્ડ થયો અવાજ

ભારત અને ઓસ્ટ્રેલિયા વચ્ચે બ્રિસબેનના ગાબા મેદાન પર બોર્ડર ગાવસ્કર ટ્રોફીની ચોથી અને અંતિમ ટેસ્ટ મેચ રમાઈ રહી છે. આ દરમિયાન ટીમ ઈન્ડિયાના વિકેટકીપર બેટ્સમેન રિષભ પંત ક્રિકેટના મેદાન પર પોતાની રમત ઉપરાંત અન્ય એક વાતને લઈને ચર્ચામાં છે. પંતે આ ટેસ્ટ મેચના ચોથા દિવસે અલગ જ ગીત ગાતા જોવા મળ્યો અને ગીત ગાઈને ઓસ્ટ્રેલિયાના બેટ્સમેનોને સ્પિન બોલિંગમાં ફસાવવાની વાત કરી રહ્યો હતો.

સોમવારે જ્યારે ભારતીય ટીમ મેચમાં ફિલ્ડીંગ કરી રહી હતી ત્યારે પંત એમ કહેતા જોવા મળ્યો કે, આવી રીતે વેબ (જાળ) ફેંકો જાળ.' આ બાદ તે ક્રીઝની પાછળ 'સ્પાઈડર મેન સ્પાઈડર મેન તુને ચુરાયા મેરે દિલ કા ચેન' સોન્ગ ગાતા જોવા મળ્યો. આ દરમિયાન તે વોશિંગ્ટન સુંદરને પોતાના હાથથી ઈશારો કરીને બતાવી રહ્યો હતો કે તેણે શું કરવું જોઈએ.


જે સમયે પંત આ ગીત ગાઈ રહ્યો હતો ત્યારે ઓસ્ટ્રેલિયાની બીજી ઈનિંગ્સની 56મી ઓવર ચાલી રહી હતી. આ દરમિયાન પોતાના કરિયરની પહેલી ટેસ્ટ રમી રહેલો વોશિંગ્ટન સુંદર બોલિંગ કરી રહ્યો હતો. ઓસ્ટ્રેલિયા માટે કેપ્ટન ટિમ પેન અને કેમરન ગ્રીન ક્રીઝ પર હતા.

ઉલ્લેખનીય છે કે મેચના ચોથા દિવસની રમતના અંતે ઓસ્ટ્રેલિયાએ બીજી ઈનિગ્સમાં 294 રન બનાવ્યા હતા અને તેણે જીત માટે ભારત સામે 328 રનનો ટાર્ગેટ મૂક્યો હતો. ટીમ ઈન્ડિયાએ ચોથા દિવસની રમતના અંત સુધીમાં વિકેટ ગુમાવ્યા વિના 4 રન બનાવ્યા હતા.

4 ટેસ્ટની સીરિઝમાં હાલ બંને ટીમો 1-1ની બરાબરી પર છે. જો ભારત આ મેચ જીતી લે છે અથવા ડ્રો કરે છે તો પણ ગાવસ્કર-બોર્ડર ટ્રોફી પર તેનો કબજો રહેશે. પરંતુ જો ભારત અહીં મેચ હારી જાય છે તો તેના હાથમાંથી મેચની સાથે ટ્રોફી પણ જતી રહેશે. એવામાં પાંચમા દિવસે ભારતીય બેટ્સમેનો કેવું પ્રદર્શન કરે છે, તેના પર સૌ કોઈની નજર રહેશે.