રોહિત અને વિરાટ ટેસ્ટમાં પહેલીવાર અલગ અંદાજે આઉટ થયા, જાણો કયો વિચિત્ર રેકોર્ડ નોંધાયો

દિલ્હીઃ ભારત અને ઓસ્ટ્રેલિયા વચ્ચે ચાર ટેસ્ટ મેચની સિરીઝની બીજી મેચ દિલ્હીમાં રમાઈ હતી. ટીમ ઈન્ડિયાએ આ મેચ 6 વિકેટે પોતાને નામ કરી લીધી હતી. આ મેચમાં કેપ્ટન રોહિત શર્મા અને વિરાટ કોહલી એક ખાસ કારણથી ચર્ચામાં આવી રહ્યા છે. આમ જોવા જઈએ તો 115 રનના ટાર્ગેટને ચેઝ કરવા ઉતરેલી ભારતીય ટીમને રોહિતે ઝડપી શરૂઆત અપાવી હતી. જોકે, ત્યારપછી રોહિતે પોતાની વિકેટ ગુમાવી દીધી હતી. જોકે આ દરમિયાન આ બંને દિગ્ગજો અલગ અંદાજે પેવેલિયન ભેગા થયા હતા. આની સાથે જ તેમણે પોતાને નામ વિચિત્ર રેકોર્ડ નોંધાવી દીધો હતો.

રોહિત શર્મા રન આઉટ થયો
બીજો રન લેવાના ચક્કરમાં રોહિત શર્માએ પોતાની વિકેટ ગુમાવી દીધી હતી. ટેસ્ટ કરિયરની વાત કરીએ તો રોહિત શર્મા ઈન્ટરનેશનલ કારકિર્દીમાં પહેલીવાર રનઆઉટ થયો હોવાના અહેવાલો ફરતા થયા છે. આંકડાકીય માહિતી પર નજર કરીએ તો આંતરરાષ્ટ્રીય સ્તરે પહેલીવાર ટેસ્ટ મેચમાં રોહિત શર્મા રનઆઉટ થયો છે.

બીજો રન લેવા જતા રોહિત શર્માએ વિકેટ ગુમાવી
રોહિતને પીટર હેન્ડ્સકોમ્બ અને વિકેટકીપર એલેક્સ કેરીએ એકસાથે રન આઉટ કર્યો હતો. રોહિતે બીજો રન લેવા માટે દોડ લગાવી હતી એ દરમિયાન તેણે પોતાની વિકેટ ગુમાવી દીધી હતી. રોહિત અત્યાર સુધી 47 ટેસ્ટ રમી ચૂક્યો છે અને 80 ઇનિંગ્સમાં પ્રથમ વખત રનઆઉટ થયા બાદ પેવેલિયન પરત ફર્યો છે. આ પહેલા રોહિત ક્યારેય ટેસ્ટમાં રનઆઉટ થયો ન હતો.

ભારતીય કેપ્ટન ટેસ્ટમાં સૌથી વધુ વખત કેચ આઉટ થયા છે. આ પછી બોલ્ડ, કોટ બિહાઈન્ડ અને એલબીડબ્લ્યુ થયો હતો. તે સૌથી લાંબા ફોર્મેટમાં પ્રથમ વખત રનઆઉટ થયો હતો. રોહિતે 20 બોલમાં ત્રણ ચોગ્ગા અને બે છગ્ગાની મદદથી 31 રનની ઇનિંગ રમી હતી.

કોહલી કઈક આવી રીતે થયો પેવેલિયન ભેગો
વિરાટ કોહલી પણ 31 બોલમાં ત્રણ ચોગ્ગાની મદદથી 20 રન બનાવીને આઉટ થયો હતો. તેને ટોડ મર્ફીએ વિકેટકીપર કેરીના હાથે સ્ટમ્પિંગ કરાવ્યો હતો. કોહલી અત્યાર સુધી 106 ટેસ્ટ રમી ચૂક્યો છે અને તેની 180 ઇનિંગ્સમાં પ્રથમ વખત તે સ્ટમ્પિંગનો શિકાર થયો હતો. કોહલી ટેસ્ટમાં સૌથી વધુ વખત કેચ આઉટ થયો છે. આ પછી કોટ બિહાઈન્ડ અને એલબીડબલ્યુ થયો છે. આ ઉપરાંત તે 13 વખત ક્લીન બોલ્ડ થયો છે. તેને યોગાનુયોગ કહો કે પછી જોવાજેવું, કારણ કે રોહિત-કોહલી બંને એક જ ઈનિંગમાં અલગ અંદાજે આઉટ થયા છે.

મેચમાં શું થયું?
ઓસ્ટ્રેલિયાએ પહેલી ઈનિંગમાં 263 રન કર્યા હતા. આની સાથે જ ભારતીય ટીમ 262 રન બનાવી શકી હતી. ઓસ્ટ્રેલિયાને પ્રથમ દાવમાં એક રનની લીડ મળી હતી. તેની ટીમ બીજા દાવમાં 113 રનમાં સમેટાઈ ગઈ હતી. આ રીતે ભારતને 115 રનનો ટાર્ગેટ મળ્યો હતો. ઓસ્ટ્રેલિયા માટે બીજા દાવમાં ટ્રેવિસ હેડે 43 અને માર્નસ લાબુશેને 35 રન બનાવ્યા હતા. આ બે સિવાય કોઈ બેટ્સમેન ડબલ ફિગરને સ્પર્શી શક્યો નહોતો. અનુભવી બેટ્સમેન સ્ટીવ સ્મિથ માત્ર 9 રન બનાવી શક્યો હતો. ભારત તરફથી જાડેજાએ 7 અને રવિચંદ્રન અશ્વિને 3 વિકેટ લીધી હતી.

ભારતીય ટીમે બાજી મારી લીધીભારતે ચાર વિકેટે 118 રન બનાવીને મેચ જીતી લીધી હતી. રોહિત શર્માએ 31 અને ચેતેશ્વર પૂજારાએ અણનમ 31 રન બનાવ્યા હતા. કેએસ ભરત 23 રન બનાવીને અણનમ રહ્યો હતો. વિરાટ કોહલીએ 20 અને શ્રેયસ અય્યરે 12 રન બનાવ્યા હતા. કેએલ રાહુલ એક રન બનાવીને આઉટ થયો હતો.