1 વર્ષના પ્રતિબંધ બાદ પણ સુધર્યો નથી સ્મિથ! ચાલુ મેચમાં પિચ સાથે છેડછાડ કરતા પકડાયો

લગભગ બે વર્ષ પહેલા સાઉથ આફ્રિકા પ્રવાસ દરમિયાન બોલ સાથે છેડછાડ કરવાના કારણે 1 વર્ષનો પ્રતિબંધ અને પોતાની કેપ્ટનશીપ ગુમાવી ચૂકેલો સ્ટીમ સ્મિથ હજુ પણ સુધર્યો નથી એમ લાગી રહ્યું છે. ભારત સામેની સિડની ટેસ્ટમાં તે પિચ સાથે છેડછાડ કરતા રંગે હાથ પકડાઈ ગયો હતો. હકીકતમાં સિડની ટેસ્ટમાં મેજબાન ઓસ્ટ્રેલિયાએ ટીમ ઈન્ડિયા સામે જીત માટે 407 રનનો ટાર્ગેટ રાખ્યો હતો. પાંચમા દિવસે રિષભ પંત અને ચેતેશ્વર પુજારાની ઈનિંગ્સની મદદથી ભારત ધીમે-ધીમે જીત તરફ વધી રહ્યું હતું.

ઓસ્ટ્રેલિયન બોલર ખાસ કરીને નાથન લાયને પ્રેશર બનાવવાનો પ્રયાસ કર્યો, પરંતુ તેને કોઈ મદદ ન મળી શકી. મેજબાન ટીમ આ જોડીને તોડવા માટે કેટલીક વસ્તુઓ કરવાનો પ્રયાસ કર્યો, જેમાં એક કેમેરામાં કેદ થઈ ગઈ. આ ફૂટેજમાં ઓસ્ટ્રેલિયન ખેલાડી બેટ્સમેનના માર્કને પગથી હટાવતો જોવા મળી રહ્યો છે.

ટેસ્ટ મેચના છેલ્લા દિવસે પહેલા સેશનમાં ડ્રિંક્સ બ્રેક દરમિયાન રમત શરૂ થવાના પહેલા જ સ્ટમ્પ કેમેરામાં ઓસ્ટ્રેલિયન ખેલાડીઓ પિચ પર બેટ્સમેનોના માર્કને ભૂસી રહ્યા હતા. આ બાદ પંત ક્રીઝ પર આવ્યો. કેમેરામાં 49 નંબરની જર્સીવાળો ખેલાડી પોતાના પગથી માર્કને ભૂસતા દેખાયો હતો. આ જર્સી નંબર સ્ટીવ સ્મિથનો છે. આ બાદ સ્મિથની ખેલ ભાવના પર સવાલ ઉઠવા લાગ્યા છે. આટલું જ નહીં આ આઈસીસીના નિયમોનું ઉલ્લંઘન પણ છે.


ઉલ્લેખનીય છે કે સ્ટીવ સ્મિથ અને ડેવિડ વોર્નર તે સમયે ટીમના કેપ્ટન અને વાઈસ કેપ્ટન હતા જ્યારે 24 માર્ચ 2018એ સાઉથ આફ્રિકા સામે ત્રીજી ટેસ્ટમાં કેમરૂન બેનક્રાફ્ટ બોલ પર સેન્ડપેપર ઘસતા દેખાયો હતો. ત્રણેય ખેલાડીઓને આ બાદ 1 વર્ષ માટે પ્રતિબંધિત કરી દેવાયા હતા.