2021નો T-20 વર્લ્ડકપ ભારતમાં રમાશે, ICCની બેઠકમાં મોટો નિર્ણય

ભારતમાં ક્રિકેટ પ્રેમીઓ માટે આઈસીસીએ એક મોટી ખુશખબર આપી છે. ટી-20 વર્લ્ડકપ 2021ની મેજબાનીને લઈને રસ્તો સાફ થઈ ગયો છે. આ ટૂર્નામેન્ટ ભારતમાં જ રમાશે, જ્યારે આ બાદ 2022માં રમાનારી ટૂર્નામેન્ટનું આયોજન ઓસ્ટ્રેલિયામાં થશે. આ મામલે નિર્ણય ભારતીય ક્રિકેટ બોર્ડ અને ક્રિકેટ ઓસ્ટ્રેલિયાના પ્રમુખની ઈન્ટરનેશનલ ક્રિકેટ કાઉન્સિલની શુક્રવારની બેઠકમાં લેવામાં આવ્યો.

આ રીતે 2021ના ટી-20 વર્લ્ડકપ અને 2023ના વર્લ્ડકપનું ભારતમાં આયોજન નક્કી થઈ ગયું છે. જ્યારે 2022ના ટી-20 વર્લ્ડકપનું આયોજન ઓસ્ટ્રેલિયામાં જ કરવામાં આવશે. બીજી તરફ આઈસીસીએ મહિલા વન-ડે વર્લ્ડકપ 2021ને રદ કરી દીધો છે. હવે આ ટૂર્નામેન્ટ 2022માં 6 ફેબ્રુઆરીથી 7 માર્ચ સુધી ન્યૂઝીલેન્ડમાં જ રમાશે.

આવું છે શિડ્યુલ
ભારતમાં રમાનારા ટી-20 વર્લ્ડકપનું આયોજન આગામી વર્ષે ઓક્ટોબર-નવેમ્બરમાં કરવામાં આવશે. ટૂર્નામેન્ટની ફાઈનલ 14 નવેમ્બરે રમાડવામાં આવશે. ઓસ્ટ્રેલિયામાં રમાનારા ટી-20 વર્લ્ડકપ 2022નું પણ ઓક્ટોબર-નવેમ્બરમાં જ આયોજન થશે. જ્યારે ફાઈનલ 13 નવેમ્બરે રમાશે.

ઉલ્લેખનીય છે કે આ વર્ષે 18 ઓક્ટોબરે ઓસ્ટ્રેલિયામાં આઈસીસી ટી-20 વર્લ્ડકપનું આયોજન થવાનું હતું, પરંતુ કોરોનાની મહામારીને કારણે તેને પોસ્ટપોન્ડ કરી દેવામાં આવ્યું. જેનાથી ઈન્ડિયન પ્રીમિયર લીગના આયોજનનો રસ્તો સાફ થઈ ગયો. IPL 2020 હવે યુએઈમાં 19 સપ્ટેમ્બરથી શરૂ થશે.